USAID Goranboyda yem emalı məntəqələri açıb

Bakı/03.12.18/Turan: Dekabrın 3-də ABŞ Beynəlxalq İnkişaf Agentliyinin (USAID) missiya direktoru Caydex Sinqx Goranboy rayonunun Faxralı və Qaradağlı kəndlərində iki yem emalı və toxum təmizləmə məntəqələrinin açılışında iştirak edib.

ABŞ-ın Azərbaycandakı səfirliyinin məlumatına görə, bu məntəqələr yerli fermerlərə özlərinin mal-qara və quş təsərrüfatları üçün münasib qiymətə yem əldə etməyə imkan yaradacaq.

Həmin məntəqələr USAID və Azərbaycanın İqtisadiyyat Nazirliyi arasında kəndlərdə infrastrukturun yaxşılaşdırılmasına yönəlik əməkdaşlıq çərçivəsində inşa edilib.

Bu yeni məntəqələr icmaların maldarlıq, quşçuluq və kənd təsərrüfatı ilə məşğul olan 2000-ə yaxın ailənin vaxtına, puluna və enerjisinə qənaət etməyə kömək edəcək.

"İcmanıza olan dəstəyimiz ABŞ və Azərbaycan xalqları arasında davamlı dostluğun rəmzidir", deyə missiya direktoru Caydex Sinqx qeyd edib. O, həmçinin USAID və Azərbaycan hökuməti arasında möhkəm və davamlı tərəfdaşlığı alqışlayıb.

USAID-in Sosial-İqtisadi İnkişaf Fəaliyyəti (SEDA) adlı layihəsi Şərq-Qərb İdarəetmə İnstitutu (EWMI) tərəfindən icra olunur və rayonlarda sosial-iqtisadi inkişafı artırmaq və həyat səviyyəsini yaxşılaşdırmaq üçün vətəndaşların, vətəndaş cəmiyyəti təşkilatlarının, habelə hökumət nümayəndələrinin əməkdaşlığını təşviq edir. ABŞ və Azərbaycan 215,000-dən çox insanın yaşadığı 146 müxtəlif icmada 125 icma layihəsi həyata keçirib. Bu layihələr arasında yem emalı məntəqələri, texniki və suvarma, idman meydançaları, pendir istehsalı müəssisəsi, tibb məntəqələri və yollar olub. -0--