Vətəndaş sektorunun qanunun aliliyi və insan hüquqları sahəsində böhran haqqında rəyləri

Bakı/14.04.21/Turan: Ədalətli mühakimə, azadlıq və təhlükəsizlik, insan hüquqları və demokratiya məsələləri üzrə Avropa İttifaqı-Azərbaycan alt komitəsinin 9-cu iclası ərəfəsində Avropa İttifaqının Azərbaycandakı nümayəndəliyi ölkənin qanunun aliliyi və insan hüquqları sahəsində fəaliyyət göstərən vətəndaş cəmiyyəti nümayəndələri ilə virtual məsləhətləşmələr təşkil edib.

Avropa İttifaqının Bakıdakı missiyasının rəhbəri bildirib ki, ekspertlərlə virtual məsləhətləşmələr vətəndaş sektorunun Avropa İttifaqının Azərbaycan hökuməti ilə münasibətləri məsələsinə baxışlarını dəqiqləşdirmək nöqteyi-nəzərdən əhəmiyyətlidir.

Ümumilikdə ekspertlərin çıxışları müxtəlif sahələrdə qeyri-hökumət təşkilatlarının fəaliyyətinin məhdudlaşdırılması, korrupsiyaya qarşı real mübarizənin olmaması, gender problemləri, ədalətli məhkəməyə çıxışın məhdudlaşdırılması, ifadə azadlığının məhdudlaşdırılması, azad kütləvi informasiya vasitələrinin boğulması, informasiyaya çıxışın məhdudlaşdırılması, əmək hüquqlarının müdafiə olunmaması və digər problemlərdən ibarət xoşagəlməz mənzərəni üzə çıxarıb.

Hakimiyyətin vətəndaş cəmiyyəti ilə dialoqda, onun hökumətin qəbul etdiyi qərarlarla bağlı məsləhətləşmələrdə iştirakında maraqlı olmadığı, habelə vətəndaş cəmiyyətinin, kütləvi informasiya vasitələrinin hakimiyyətin qəbul etdiyi və həyata keçirdiyi qərarlara nəzarət həyata keçirməsinə gizli məhdudiyyət olduğu qeyd edilib.

Virtual məsləhətləşmələrdə vətəndaş sektorundan Əliməmməd Nuriyev, Mirvari Qəhrəmanlı, Zaur Əkbər, Vüsalə Hüseynli, Elçin Sultanov, Ziya Quliyev, Əhməd Əlili, Bəxtiyar Hacıyev, Xalid Ağaliyev, Mehman Əliyev və başqaları iştirak ediblər.

Avropa İttifaqının Azərbaycandakı nümayəndəliyindən bildiriblər ki, Ədalətli mühakimə, azadlıq və təhlükəsizlik, insan hüquqları və demokratiya məsələləri üzrə Avropa İttifaqı-Azərbaycan alt komitəsinin 9-cu iclası 26-27 aprel tarixlərində virtual formatda keçiriləcək. İclasda Avropa institutlarının ekspertləri və Azərbaycanın səlahiyyətli orqanlarının nümayəndələri iştirak edəcəklər. Tədbir Azərbaycanda qanunun aliliyi və insan hüquqları sahəsində vəziyyətin yekunlarını qiymətləndirmək imkanı verəcək. -0-