VHP: «Bu, xalqın cibinə girməkdir»

“Neftin qiymətinin ucuzlaşması və Azərbaycan hökumətinin bu faktora qarşı çevik olmayan, ləng və yanlış iqtisadi siyasətinin acı nəticəsi özünü getdikcə daha dərindən büruzə verir”, - Vətəndaş Həmrəyliyi Partiyasının (VHP) ölkədə elektrik və təbii qazın bahalaşdırılması ilə bağlı Tarif Şurasının qərarına dair bəyanatında bildirilir. 

Müəlliflər büdcəyə daxilolmaların azalması və yaranan kəsirin əvəzini ödəmək üçün hazırda hökumətin kommunal xidmətlərin qiymətini qaldırmaq yolunu tutması çox acınacaqlı hal kimi dəyərləndirirlər. Sənəddə bu  fakt hökumətin apardığı  yanlış siyasətin acı nəticəsinin yenə də xalqın üzərinə qoyulması, hökumətin acizliyinin nəticəsi adlandırılır: “Çünki qiymət artımı ilə bağlı verilən açıqlamada bunun səbəbləri kifayət qədər əsaslandırılmayıb və bu artımın digər zəruri ərzaq məhsullarına təsirini önləmək üçün tədbirlər planı hazırlanmayıb”, -bəyanatda vurğulanır.

Müəlliflər qeyd edirlər ki, bu bahalaşmadan sonra ölkədə yeni bir balahaşma, inflyasiya dalğasının yaşanacağı şübhəsizdir. Əməkhaqlarının artırılması barədə müzakirələr və bu barədə qərar qaçılmazdır. 2017-ci ildən qüvvəyə minəcəyi haqda rəsmi açıqlamadan bir ay öncə qiymətlərin bahalaşdırılmasının da məntiqi izahı yoxdur. Sənəddə  deyilir ki, bu addım hökumətin öz xalqının, xüsusilə onun aztəminatlı hissəsinin cibinə girməsi kimi başa düşülür.

Son olaraq müəlliflər bu qərara dərhal yenidən baxılmasını, maaşların artımı ilə qiymət artımı arasındakı disbalansın qorunmasını tələb edirlər.