Xəzər sammiti ərəfəsində Rusiya dənizin milli sektorlara bölünməsinə qarşı çıxdı

 RF prezidentinin sərhədlərin delimitasiyası və demarkasiyası üzrə xüsusi nümayəndəsi, XİN-in xüsusi tapşırıqlar üzrə vəkili İqor Bratçikov bildirib ki, Moskva Xəzər dənizinin milli sektorlara bölünməsinin əleyhinədir.

Bazar ertəsi keçirilən mətbuat konfransında o bildirib ki, Rusiya ilk gündən Xəzər dənizinin bölünməsinə etiraz edib. Lakin sonradan Xəzərdə sahildən 25 mil məsafədə “milli zonalar” yaradılması ilə razılaşıb.

“Qeyd etmək istərdim ki, bu milli zolaqların arxasında ümumi su məkanı qalmaqdadır. Rusiya tərəfi Xəzər dənizinin sektorlara bölünməsini dəstəkləmir”, deyə Bratçikov qeyd edib.

Sentyabrın 29-da Həştərxanda Rusiya, Azərbaycan, İran, Qazaxıstan və Türkmənistan liderlərinin iştirakı ilə Dördüncü Xəzər Sammiti keçiriləcək. Bratçikov bu görüşdə Xəzər dənizinin statusunun müəyyən edilməsi üzrə irəliləyiş əldə olunacağı fikrini bildirib.

“Əminəm ki, orada konvensiyanın hələ açıq qalan aspektləri üzrə razılıq əldə olunması istiqamətində böyük addım atılacaq”. Xüsusən, o, sammitdə Xəzərin su səthinin bölünməsi məsələsinin həllində irəliləyiş əldə olunacağı barədə fikir bildirib.

Qeyd edək ki, Azərbaycan və Türkmənistan türkmən qazının Rusiyadan yan keçməklə, Xəzər və Azərbaycan vasitəsilə Avropaya nəqlini təmin edəcək Transxəzər qaz kəmərinin tikintisi ehtimalını fəal şəkildə müzakirə etməyə başladıqdan sonra Moskvanın mövqeyi sərtləşib.

Rusiya ekspertləri artıq sentyabrın 20-də Azərbaycanda bünövrəsi qoyulan Cənubi Qafqaz qaz dəhlizi layihəsinin başlanması ilə bağlı həyəcan təbili çalır.

Bu layihədə Rusiyaya yaxın gələcək üçün risk yoxdur, belə ki, Xəzər regionundan ilk qaz nəqli ildə 10 mlrd. kubmetri keçməyəcək. Lakin gələcəkdə, İran və Türkmənistan, habelə İraq da sistemə qoşulduqdan sonra bu, Rusiyanın qaz ixracı üçün ciddi rəqabət olacaq, ekspert Mixail Krutixin belə hesab edir. -02D-