Rusiya sülhməramlılarının Qarabağdan çıxarılması mərasimi (yenilənib)

Rusiya Müdafiə nazirliyinin general-polkovniki Yevgeni Nikiforov və Azərbaycan Silahlı Qüvvələrinin Baş Qərargah rəisi, general-polkovnik Kərim Vəliyev bir neçə yüz sülhməramlını Xocalıdan yola salmaq üçün gəliblər.

Onlar öz çıxışlarında İkinci Qarabağ Müharibəsi başa çatdıqdan sonra regionda sülhün qorunmasında sülhməramlıların rolunu qeyd ediblər.

Sülhməramlıların normal fəaliyyətinin təmin edilməsində xidmətlərinə görə Rusiya və Azərbaycan zabitlərinə mükafatlar təqdim olunub.

Sonra bir neçə yüz sülhməramlı Rusiya Müdafiə Nazirliyinin hərbi orkestrinin sədaları altında Xocalı aeroportunun uçuş zolağı boyunca yürüş edib.

Mərasimin sonunda konsert olub.

* * *

Xocalı aeroportu ərazisində Rusiya sülhməramlılarının bazasının bağlanış mərasimi keçirilir

Mayın 15-də gündüz Qarabağda, Xocalı aeroportu ərazisində Rusiya sülhməramlılarının bazasının bağlanış mərasimi başlayıb.

2 minə yaxın sülhməramlı 2020-ci ilin noyabrında İkinci Qarabağ Müharibəsi başa çatdıqdan sonra Qarabağa yerləşdirilmişdi. Onların vəzifəsi tərəfləri ayırmaq, yolları qorumaq, Qarabağ erməniləri və Ermənistan arasında kommunikasiyanı təmin etmək idi.

19-20 sentyabr 2023-cü ildə Azərbaycan Silahlı Qüvvələrinin hərbi əməliyyatından, erməni əhalinin Ermənistana getməsindən və yerli hərbi birləşmələrin tərksilah edilməsindən sonra sülhməramlıların qalmasına ehtiyac olmadı.

2024-cü ilin aprelində Azərbaycan və Rusiya liderləri sülhməramlıların Qarabağdan çıxarılması məsələsini razılaşdırdılar. İndiyə qədər sülhməramlıların hərbi texnikasının və şəxsi heyətinin böyük hissəsi ərazidən çıxarılıb və yollardakı 30 buraxılış məntəqəsinin hamısı ləğv edilib.

Sülhməramlıların əsas bazası Xocalı aeroportunun ərazisində yerləşir. Bu, zabit və sıravi heyətin yaşaması və işləməsi üçün 12-yə yaxın mobil binadan, texniki və rabitə xidməti üçün obyektlərdən ibarədir.

Sülhməramlılar Azərbaycanın Goranboy rayonunda yerləşən Goran dəmir yolu stansiyasına qədər öz yük maşınlarında gedirlər. Sonra texnikanı dəmir yolu eşelonlarına yükləyirlər və Rusiyaya gedirlər. Tam çıxarılma mayın sonuna qədər başa çatmalıdır.