YAP qurultayının keçirilməsi qanunu pozub?

Bakı/08./Turan: Hakim Yeni Azərbaycan Partiyasının sədri, hazırki dövlət başçısı İlham Əliyevin prezidentliyə namizədliyinin rəsmi olaraq irəli sürüldüyü partiya qurultayı təşkilatın nizamnaməsini və qanunvericiliyi pozub. Bu barədə hüquqşünas Ələsgər Məmmədli öz Facebook səhifəsində yazıb (https://www.facebook.com/elesger?hc_ref=ARStReklrkPf2GTtEbCpr-ivqgHrpsvkoABxKHyO7rC8H16JAgOUMGvW6EfshcKms04&fref=nf ).

Onun sözlərinə görə, partiyanın nizamnaməsinə əsasən, YAP qurultayları ən az dörd ildə bir çağırılır. Əvvəlki qurultayın 2013-cü il iyulun 7-də keçirildiyini nəzərə alaraq, bu müddət pozulub.

"Görəsən Ədliyyə Nazirliyinin reaksiyası olacaqmı? Axı Ədliyyə Nazirliyi digər partiyalara qanuna ciddi əməl etmək zəruriliyini sistemli şəkildə təlqin edir", deyə Məmmədli yazır.

Ekspertin qınağına səbəb olan digər məsələ qurultayın çağırılması müddətidir.

Qurultayın çağırılma müddəti, nümayəndəlik norması və gündəliyi qurultayın başlamasından azı bir ay əvvəl Siyasi Şura tərəfindən elan edilir.

Siyasi Partiyalar haqqında Qanunun da tələbi qurultayın keçirilməsinə dair informasiyaların öncədən elan olunması və nizamnaməyə uyğun keçirilməsidir.

Amma KİV-də YAP qurultayının çağırılması haqqında yanvarın 9-dan əvvələ aid məlumat yoxdur. -06D-