Yens Stoltenberq Qarabağdakı hadisələrdən narahatdır və NATO-nu hərbi xərcləri artırmağa çağırır

NATO Baş Katibi Yens Stoltenberq Dağlıq Qarabağdakı hadisələrdən və zorakılığın artmasından narahatlığını bildirib. Bu barədə o, bazar ertəsi Haaqada NATO Parlament Assambleyasının iclasında bildirib.

“Dağlıq Qarabağda bu yaxınlarda baş vermiş hadisələrdən narahatam. Bu göstərir ki, münaqişənin hərbi yolla həlli ola bilməz”, deyə Stoltenberq bildirib. Onun sözlərinə görə, “siyasi həllin alternativi yoxdur”. “Mən NATO-nun heç bir birbaşa rolunu görmürəm, amma NATO Dağlıq Qarabağda danışıqlar vasitəsilə davamlı sülhə şərait yaratmaq üçün Minsk prosesini dəstəkləyir”, deyə NATO saytı baş katibdən sitat gətirir.

Mənbənin məlumatına görə, Stoltenberq qeyd edib ki, NATO-nun qapıları Ukrayna üçün əvvəlki kimi açıqdır.

“Yadımdadır, Buharest sammitində qərara aldıq ki, Ukrayna üzv olacaq. Ukrayna üzvlük üçün meyarları yerinə yetirərsə, bu qərar indiyədək qüvvədədir”, deyə o bildirib.

Alyansın baş katibi həmçinin təşkilat üzvlərini Rusiyanın Ukraynaya təcavüzü və Moskvanın bütünlükdə Qərbə qarşı meydan oxurcasına davranışı fonunda müdafiə xərclərini artırmağa çağırıb. “Bütün müttəfiqlər (NATO üzrə) öz töhfələrini verməlidir”, deyə baş katib qeyd edib. O xatırladıb ki, Uels sammitində NATO üzvü olan ölkələr 10 il ərzində müdafiə xərclərini ÜDM-in 2%-nə qədər artırmağı qərara alıblar. Onun sözlərinə görə, ABŞ, Böyük Britaniya, Yunanıstan və Estoniya artıq bu çağırışı yerinə yetirirlər. “Hamımızın bu məqsədə nail olacağımıza ümid edirəm”, deyə o qeyd edib.

NATO üzvü olan ölkələr sentyabrın 5-də Uels sammitində alyansın kollektiv müdafiəsinin gücləndirilməsi üzrə plan qəbul ediblər və yaradılan çevik qüvvətlərin parametrlərini razılaşdırıblar. Bu addımların Rusiyanın Ukraynaya qarşı siyasətinə cavab olaraq atıldığı vurğulanıb. -02D-