Yerevan Azərbaycanla sərhəddin demarkasiyası məsələsində Moskvanın dəstəyini qazanmağa çalışır

Bakı/29.05.21/Turan: Ermənistanın müdafiə naziri vəzifəsini icra edən Vaqarşak Arutyunyan mayın 28-də Moskvada  Rusiyanın müdafiə naziri Sergey Şoyqu ilə görüşüb.

Görüşdə Dağlıq Qarabağda sülhməramlı missiyanın gedişi, Ermənistanın Sünik və Geqarkunik vilayətlərində vəziyyət, həmçinin Ermənistan-Rusiya ikitərəfli hərbi əməkdaşlığı və regional təhlükəsizlik ilə bağlı məsələlər müzakirə olunub, Ermənistan KİV-i məlumat verib.

Arutyunyan Azərbaycan bölmələrinin Ermənistan ərazisinə keçməsinin təfərrüatlarını, həmçinin Ermənistan tərəfinin cavab tədbirlərini təqdim edib. Onun sözlərinə görə, Azərbaycan "sərhədlərin dəqiqləşdirilməsinin yanlış motivləri əsasında təxribatlar həyata keçirir" və Ermənistan ərazisini dərhal tərk etməlidir. Tərəflər vəziyyətdən çıxmağın mümkün variantlarını nəzərdən keçiriblər və lazımi addımlar barədə razılığa gəliblər", - Ermənistan Müdafiə Nazirliyi bildirib.

Xatırladaq ki, bundan öncə baş nazir Paşinyan Azərbaycanla dövlət sərhəddi xətti boyunca Rusiya və beynəlxalq müşahidəçilərin yerləşdirilməsini təklif etmişdi. O, Kəlbəcər və Laçınla qonşu olan Sünik ilə Geqarkundəki sahəni nəzərdə tutmuşdu. Eyni zamanda, Paşinyan, erməni tərəfin 30 ildir Azərbaycanın Qazax rayonunun 7 kəndini tutduğu Tavuş bölgəsinə müşahidəçilərin yerləşdirilməsini təklif etmir. Buradan belə nəticəyə gəlmək olar ki, Yerevan rusların əli ilə azərbaycanlı hərbçiləri tutduqları mövqeləri tərk etməyə məcbur etmək və eyni zamanda Qazaxın işğal altındakı kəndlərini geri qaytarmaq istəmir. -02D-