Yerevanda polis və mitinq iştirakçılarının toqquşması

Yerevan/16.04.18/Turan: Yerevanda Baqramyan prospektində etirazçılar və polis arasında qarşıdurma nəticəsində onlarla nümayişçi xəsarət alıb, bu barədə "Azadlıq" radiosu məlumat yayıb.

Polis tikanlı tel çəkib və xüsusi vasitələrdən - səs qumbarlarından istifadə edib. Bundan sonra birinci sıradakı polis əleyhqaz taxıb. Həmçinin, polis nümayişçilərə xəbərdarlıq edib ki, nümayişin dağıdılması haqqında qərar qəbul edilib.

Bir müddət əvvəl müxalif deputat Nikol Paşinyan bildirib ki, o və üç həmkarı "iş yerinin" - Milli Məclisin qarşısına gəlmək istəyir. Yerevan polis rəisinin müavini Valeri Osipiyan buna cavab olaraq bildirib ki, yalnız deputatları buraxacaq. Amma Paşinyan bildirib ki, ona işə necə və haradan gəlməli olduğu barədə göstəriş verə bilməzlər. O bildirib ki, onunla birlikdə jurnalistlər və qəbuluna yazılmış vətəndaşlar da gəlir. Bundan sonra Paşinyan hasarı keçməyə çalışıb, amma polis ona və ardınca gələn etirazçılara mane olub, qarşıdurma yaranıb və polis xüsusi vasitələr tətbiq edib.

Xatırladaq ki, bu gün səhər polis Milli Məclisin binasının yerləşdiyi Baqramyan prospektinin başlanğıcında kordon qurub.

Bu gün səhər tezdən Nikol Paşinyanın başçılıq etdiyi hərəkatı dəstəkləyən yüzlərlə fəal və tələbə Ermənistan paytaxtında bir sıra mərkəzi küçələri və qovşaqları bağlayıblar, bu da şəhərin bir çox yerlərində nəqliyyatın hərəkətini iflic vəziyyətinə salıb.

Etirazçılar bu şəkildə Serj Sarkisyanın artıq baş nazir vəzifəsində hakimiyyətini uzamasını qarşısını almağa çalışırlar. Parlamentdə eks-prezidentin namizədliyi ilə bağlı səsvermə aprelin 17-nə təyin edilib. -02D-