Zaxarova: "Ermənistan-Azərbaycan sərhədinin demarkasiyası Rusiyanın səylərinin mühüm istiqamətidir"

Bakı/02.08.22/Turan: Rusiya Azərbaycanla Ermənistan arasında sülh müqaviləsinin hazırlanması üçün səy göstərir. Rusiya xarici işlər nazirinin xüsusi nümayəndəsi İqor Xovayev ümumi dilin tapılması, qarşılıqlı məqbul əsas prinsiplərin və sülh razılaşmasının parametrlərinin əldə edilməsi məqsədilə tərəflərlə mütəmadi məsləhətləşmələr aparır. Belə təmaslar iyulun 21-də Bakıda və iyulun 28-də Yerevanda baş tutub. Bu barədə avqustun 2-də brifinqdə Rusiya  Xarici İşlər Nazirliyinin nümayəndəsi Mariya Zaxarova bildirib.

"Ermənistan-Azərbaycan sərhədinin demarkasiyası Rusiyanın Zaqafqaziya qonşuları arasında dialoqun yaxşılaşdırılmasına dair vasitəçilik səylərinin mühüm istiqamətidir. Bu prosesdə Moskvanın məşvərətçi rolu 26 noyabr 2021-ci il tarixli Soçi üçtərəfli bəyanatında qeyd olunub. Mayın sonunda müvafiq ikitərəfli komissiya yaradılıb və iki ölkənin sərhədində Ermənistan və Azərbaycan nümayəndələrinin ilk tanışlıq görüşləri keçirilib.

Biz öz tərəfimizdən Rusiya ərazisində erməni və azərbaycanlı dostlarımızı qəbul etməyə həmişə hazırıq. Əminik ki, Rusiyanın postsovet məkanında sərhəd demarkasiyası sahəsində unikal, peşəkar imkanları Ermənistan-Azərbaycan sərhədində və ümumilikdə regionda təhlükəsizliyi xeyli möhkəmləndirə bilər. Biz ondan çıxış edirik ki, Yerevan və Bakı müəyyən tədbirlərin keçirilməsi üçün konkret vaxtı müəyyənləşdirəcəklər", - Zaxarova qeyd edib. 02D