Zəngəzur dəhlizi ilə bağlı Azərbaycan və Rusiyanın mövqeləri üst-üstə düşür – İlham Əliyev

Bakı/22.07.21/Turan: Bakı və Moskvanın Qarabağla bağlı mövqeləri üst-üstə düşür, Azərbaycan və Rusiya Qarabağ münaqişəsinin başa çatdığını hesab edir. Bu barədə prezident İlham Əliyev iyulun 22-də AzTV dövlət televiziyasına müsahibəsində bildirib.

Əliyev regiondakı vəziyyəti iyulun 20-də Moskvaya səfəri zamanı RF prezidenti Vladimir Putinlə müzakirə edib.

“Biz müharibədən sonra yaranmış vəziyyəti, o cümlədən Zəngəzur dəhlizini və postmünaqişə dövrünü müzakirə etdik. Bizim yanaşmamızda fikir ayrılığı yoxdur”, deyə Əliyev bildirib. 

Onun sözlərinə görə, Rusiya və Azərbaycan “müharibənin başa çatdığı, münaqişənin başa çatdığı” barədə eyni fikirdədir.

Əliyev Ermənistanda revanşist meylləri yolverilməz adlandırıb və müharibə risklərinin minimuma endirilməsi zərurətini qeyd edib.

“Zəngəzur dəhlizinə gəldikdə, mən cənab Putinə bildirdim ki, bizdə olan məlumata görə, Ermənistan bu məsələ ilə bağlı yenə də özünü səmimi aparmır. Fikir vermisinizsə, mən cənab Şarl Mişellə mətbuat konfransında dedim ki, bütün yollar paralel şəkildə açılmalıdır və selektiv yanaşma olmamalıdır, yəni ayrı-seçkilik olmamalıdır. Amma biz görürük ki, Ermənistan burada da növbəti dəfə hansısa oyun oynamaq istəyir”, deyə Azərbaycan prezidenti qeyd edib.

Onun sözlərinə görə, Zəngəzur dəhlizi, 10 noyabr 2020-ci il tarixli üçtərəfli sazişin 9-cu maddəsində nəzərdə tutulduğu kimi, açılmalıdır.

O qeyd edib ki, Ermənistan iyundan etibarən regionda kommunikasiyaların açılması üzrə baş nazir müavinləri səviyyəsində üçtərəfli işçi qrupun işini faktiki olaraq dayandırıb.

RF ilə ikitərəfli münasibətlərə toxunan Əliyev Azərbaycan və Rusiyanı “strateji tərəfdaşlar” adlandırıb. “Bizim aramızda çox möhkəm dostluq əlaqələri var və şəxsən mənim cənab Putinlə çox yaxın əlaqələrim var, biz bir-birinə inanan siyasətçilərik”, deyə Əliyev qeyd edib. -06D-