“Nə status var, nə Dağlıq Qarabağ”, İlham Əliyev

Bakı/22.07.21/Turan: Azərbaycan prezidenti İlham Əliyev Qarabağda yaşayan erməni əhaliyə hər hansı statusun verilməsini istisna edib. Bu zaman o, Aİ Şurasının rəhbəri Şarl Mişelin “status”, “Dağlıq Qarabağ” sözlərindən istifadə etməməsini müsbət qiymətləndirib. “Nə status var, nə Dağlıq Qarabağ”, deyə Əliyev AzTV dövlət telekanalına müsahibəsində bildirib.

O, 25 min insan üçün status yaratmağı məntiqsiz adlandırıb.

Əliyev qeyd edib ki, Azərbaycan Ermənistanla sərhəddə öz mövqeyini möhkəmləndirməyə davam edəcək.

Onun sözlərinə görə, bu məsələ Mişelin Azərbaycana səfəri zamanı müzakirə olunub. Bu zaman Əliyev hələ Yerevanda olarkən sərhəddəki əraziləri “mübahisəli ərazilər” adlandıran Mişellə razı olmadığını bildirib.

“mən izah etməyə çalışdım ki, biz öz sərhədimizə çıxmışıq. Nə üçün may ayında çıxmışıq? Çünki qar əridi. Qar əriyəndən sonra biz çıxdıq, lazım bildiyimiz nöqtələri götürdük və orada yerləşdik, orada möhkəmlənirik və möhkəmlənəcəyik”, deyə Azərbaycan prezidenti qeyd edib.

Dövlət başçısı Mişelin “status”, “Dağlıq Qarabağ” sözlərindən istifadə etməməsini “çox müdrik addım” adlandırıb. “Biz bunu qiymətləndiririk və Ermənistan da bundan nəticə çıxarmalıdır. Nə status var, nə Dağlıq Qarabağ”, deyə Əliyev sözünə davam edib.

Onun sözlərinə görə, “əgər bu söz kiminsə xoşuna gəlirsə, mən etiraz etmirəm, getsinlər öz ölkələrində Dağlıq Qarabağ adlı bir vilayət yaratsınlar, yaxud da ki, bir rayon adlandırsınlar, ya cümhuriyyət yaratsınlar, onların işidir”. “Azərbaycan ərazisində Dağlıq Qarabağ adlı inzibati ərazi yoxdur və Şarl Mişelin bu sözləri işlətməməsi, əlbəttə ki, bizim mövqeyimizə göstərdiyi hörmətin əlaməti kimi qəbul edilməlidir”, deyə Əliyev bildirib. 

O, həmçinin Laçın dəhlizindən gediş-gəliş məsələsinə toxunub.

Onun sözlərinə görə, Azərbaycan Laçın dəhlizində gündəlik monitorinq aparır və dəhlizdən neçə maşın keçdiyi, o cümlədən xaricdən gələn maşınlar barədə tam məlumata malikdir.

“Biz demişik ki, buna son qoyulmalıdır, bu, yaxşı deyil, bu, bizim ərazimizdir. Əgər kimsə hesab edir ki, biz bunu görmürük, səhv edir. Bəzi hallarda o maşınlara erməni nömrələri yapışdırılır. Ancaq biz oradayıq, biz dəhlizdəyik. Biz hər şeyi görürük, Xankəndini də, dəhlizi də”, deyə Əliyev qeyd edib.

Eyni zamanda, Əliyev bildirib ki, çıxan maşınların sayı gələn maşınların sayından çoxdur və bu, əhalinin bu əraziləri tərk etməsinin göstəricisidir.

Onun sözlərinə görə, hazırda Qarabağda maksimum 25 min erməni yaşayır. Orada yaşayanların real sayı 25 mindir. Başqa rəqəmlər də səsləndirilib ki, müharibədən sonra oraya 50 mindən çox adam qayıdıb, ola bilər, ancaq qayıdan o demək deyil ki, orada qalır. Qayıdıb, sonra çıxıb gedib, geri dönüb… 25 min insan üçün status yaratmaq hansı məntiqə sığır?”, deyə Əliyev əlavə edib. -06D-