Mehmana yardımınız üçün təşəkkür!

Dərhal reaksiya verərək Mehmanın xərçəng xəstəliyindən müalicəsi üçün lazım olan vəsaiti toplamağa kömək edən hamınıza dərin təşəkkürümü bildirirəm.

Göstərdiyiniz həmrəylik iki həftədən az müddətə GoFundMe platforması vasitəsilə 82.000 frank toplamağımıza kömək etdi, bu da Azərbaycan miqyasında görünməmiş səfərbərlik nümunəsidir. 

İyunun 11-də ilk depoziti köçürəndən sonra Mehman Cenevrə Universitet Xəstəxanasında şüa terapiyası almağa başladı. 

Ümid edirik ki, radio (şüa) terapiyası ilə aparılan bu müalicə kursu uğurlu olacaq və onun şiş ölçüsünü azaldacaq, avqustun ortalarında isə uğurla əməliyyat olunacaq. 

10 ildən çoxdur ki, Mehman həyatını Azərbaycanda korrupsiyaya qarşı mübarizəyə və insan hüquqlarının müdafiəsinə həsr edib. Bu müddət ərzində inzibati təzyiq və işgəncə, xarici səfərlərə 5 illik qadağa, şəxsiyyətini təsdiq edən sənədlərin qanunsuz ləğvi və iki illik həbs kimi çətinliklərlə üzləşib. 

Sonuncu özü və bütün ailəmiz, xüsusilə 70 yaşlı anamız Frəngiz Hüseynova üçün ən çətini oldu. Mehmanın həbsindən yaranan stresə dözməyərək xəstələndi və lazımı tibbi yardım almadan Bakıdakı dövlət xəstəxanasında dünyasını dəyişdi. 

Mehmanın son 8 ildə məruz qaldığı çoxsaylı işgəncələr onun sağlamlığına ağır zərər vurub. Ən pisi odur ki, Azərbaycan hakimiyyəti mərhum anamızla etdiyi kimi, dəfələrlə onu düzgün tibbi müayinə və müalicə almaq imkanından məhrum edib. Yalnız müxtəlif beynəlxalq insan haqları təşkilatlarının verdiyi dəstək sayəsində nəhayət, xərçənginin aşkarlanmasına səbəb olan tibbi müayinədən keçmək imkanı əldə etdi. 

Lakin bu xəstəlik onun Azərbaycan xalqının hüquq və azadlıqlarını təbliğ etmək və qorumaq üçün fəaliyyətini davam etdirməsinə mane olmayacaq.

Mehmanın GoFundMe ianə saytı vasitəsi ilə aldığı dəstək ona xərçəngə qarşı uğurlu mübarizə aparmaq üçün böyük bir ümid verdi!

Bu həm də insanların birləşdiyi və hər kəsin ortaq bir işə töhfə verdiyi zaman bir şeyin mümkün olduğunu sübut edir. Bu, onun sürətlə bərpa olunmasına, çalışqanlığına və bir gün Azərbaycanda əsl demokratiyanın hökm sürdüyünü görmək kimi ortaq bir xəyal üçün motivasiyasına stimul verir.

Bu, Mehmanın insan hüquqları və demokratiya sahəsində işlərində qətiyyət nümayiş etdirdiyi ilk hal deyil. İki illik həbs cəzasından azad edildikdən dərhal sonra Azərbaycandakı bütün günahsız siyasi məhbusların azad edilməsi üçün kampaniyaya başladı. İki həftə sonra hakimiyyət tərəfindən 50 siyasi məhbus azadlığa buraxıldı.

Bədənindəki xərçəng şişi ilə işləməyə davam edən Mehman 2019-cu ilin sonu və 2020-ci ilin əvvəlində ölkədə keçirilən bələdiyyə və parlament seçkiləri zamanı korrupsiya və geniş miqyaslı saxtakarlığı ifşa etməklə məşğul idi.

Bu, növbəti dəfə Azərbaycan hakimiyyətinin onu ağır işgəncələrə və döyülmələrə məruz qoymasına səbəb oldu, buna görə də xəstəliyin əlamətlərini hiss etməyə başladı.

İndi Mehman ilk növbədə xərçəng xəstəliyini məğlub etməli, sonra Azərbaycanda insan hüquqları və demokratiyanı qorumaq üçün sarsılmaz arzusunu reallaşdırmağa davam etməlidir. Hazırda topladığımız vəsait radioterapiya kursu və cərrahiyyə əməliyyatı üçün kifayətdir. 2020-ci ilin sentyabr ayında tamamlanacağı gözlənilən müalicənin nəticəsindən asılı olaraq əməliyyatdan sonrakı müalicəsi və sağlamlığına nəzarət məqsədilə müayinəsi üçün əlavə vəsaitin lazım olub olmadığını öyrənəcəyik. Müəlicə edən həkimlər Mehmanın uçuşu təhlükəsiz keçirə biləcəyinə qərar verdikdən dərhal sonra o Azərbaycana qayıtmağı və insan haqlarının müdafiəsi sahəsində işini davam etdirməyi planlaşdırır.

İanə  verən 2100-dən çox insana və sosial media səhifələrində GoFundMe keçidini paylaşan 25.000 Facebook istifadəçisinə təşəkkür edirik. Məhz bu səxavət sayəsində Mehman sağlamlığını bərpa edə və insan haqlarını müdafiə etməyə davam edə biləcək!

Mehmanı dəstəkləmək üçün kampaniyaya qoşulmaq arzusu ilə yüzlərlə məktubu nəzərə alaraq növbəti aylarda hamının iştirak edə bilməsi üçün keçidi açıq saxlayacağıq. 

Onun bütün tibbi ehtiyaclarının təmin ediləcəyinə və xərclərinin ödəniləcəyinə zəmanət veririk. Yığılan vəsaitin bir hissəsi artıqlıq səbəbi ilə istifadəsiz qalsa, bu vəsait insan hüquqları sahəsində işlərin davam etdirilməsi, xüsusən də zorakılıq və işgəncə qurbanlarına, qanunsuz həbs edilən və sıxışdırılan jurnalistlərə və vətəndaş cəmiyyəti nümayəndələrinə dəstək üçün istifadə ediləcək. Onlayn platformalar vasitəsilə insanların nümayiş etdirdiyi xeyriyyəçilik və həmrəylik sübut edir ki, birlikdə işləyərək cəmiyyətimizin ciddi problemlərini həll edə bilərik.

Ümid edirik ki, Mehmana dəstəyinizi və həmrəyliyinizi davam etdirəcəksiniz. Azərbaycandan olan cəsarətli gənc hüquq müdafiəçisi və jurnalist Mehman Hüseynovun həyatı və işi barədə ictimaiyyətin məlumatlandırılmasına kömək etməyinizi xahiş edirik.

Ümid edirik ki, bu kampaniya Azərbaycanda daha çox insanı hüquq və azadlıqlarının müdafiəsində cəsarətli olmağa ruhlandıracaq.