Aİ-Azərbaycan: Dialoq aktiv fazadadır

Bakı/12.02.18/Turan: Avropa İttifaqı və Azərbaycan arasında 1991-ci ildə başlayan münasibətlər yenilənir. Həmin vaxt imzalanmış saziş tərəflərin siyasi dialoq, ticarət, investisiyalar, iqtisadiyyat, qanunvericilik və mədəniyyət sahələrində işgüzar əməkdaşlığının bünövrəsini qoymağa imkan verib.

Bu gün bütün dünyada olduğu kimi, Azərbaycanda da vəziyyət nəzərəçarpacaq dərəcədə dəyişib. Yeni reallıqlar əməkdaşlığın məzmununun dəyişdirilməsini tələb edir. Aİ ilə yeni hərtərəfli sazişin imzalanması haqqında qərar qəbul edilib. O, tərəfdaşların bu gün üçün ortaq məqsəd və problemlərini əks etdirəcək. Avropa İttifaqının Azərbaycandakı səfiri Kestutis Yankauskas Turan agentliyinə eksklüziv müsahibəsində danışıqların gedişatı haqqında danışıb.

- Avropa İttifaqı və Azərbaycan arasında əməkdaşlığın hazırki səviyyəsini necə qiymətləndirirsiniz? Qarşılıqlı münasibətlərdə anlaşılmazlıq və ya problemlər var? Onları necə aradan qaldırmaq olar?

- Hazırda münasibətlərimizin səviyyəsi çox yaxşıdır. Mən bu gün səhər (fevralın 11-də - Turan) ötən cümə Brüsseldə keçirilən Əməkdaşlıq Şurasının növbəti iclasından qayıtmışam. Azərbaycanı xarici işlər naziri Elmar Məmmədyarov, Aİ-ni Ali Komissar Federika Mogerini təmsil edirdi. Bu, Aİ-Azərbaycan Əməkdaşlıq Şurası çərçivəsində sayca 15-ci görüşdür. Bundan əvvəlki iclas 2013-cü ildə keçirilib. Tərəflər arasında dialoqda belə bir fasilə yaranıb, baxmayaraq ki, görüşlər hər il keçirilməli idi.

Şadam ki, Şuranın iclası baş tutub. Bir sıra mühüm məsələlər müzakirə olunub. Regionda vəziyyət haqqında fikir mübadiləsi aparılıb, aktual olan bir sıra istiqamətlər üzrə tərəfdaşlıq səviyyəsi müzakirə olunub. Aİ-nin energetika üzrə komissarı Maroş Şevçeviç Bakıya, bu həftə, fevralın 15-də keçiriləcək Cənub Qaz Dəhlizi üzrə nazirlərin konfransına gələcək. Onunla birlikdə Avropa İnvestisiya Bankının vitse-prezidenti Vazil Xudak da gələcək. AİB ötən həftə Azərbaycan hökumətinə TAP layihəsi çərçivəsində boru kəməri çəkilməsi üçün növbəti krediti ayırıb.

Ötən həftə Aİ-nin nəqliyyat məsələləri üzrə yüksək səviyyəli nümayəndələri Bakıda olublar. Bu sahənin bütün strukturu - dəniz, dəmir yolu, avtomobil yolu, hava nəqliyyatı üzrə ətraflı danışıqlar aparılıb. Azərbaycan nəqliyyat qovşağı formalaşdırır və Aİ Asiya regionundan Avropaya Cənubi Qafqaz vasitəsilə yük daşınmasında maraqlıdır. Ortaq aviasiya məkanının yaradılması aviasiya bazarlarının açılmasına və inteqrasiyasına yönəlib, bu, istehlakçılar və operatorlar üçün yeni imkanlara, ən əsası, uçuşların təhlükəsizliyi, həmçinin hava əlaqəsinin idarə edilməsi nöqteyi-nəzərdən yüksək standartlara gətirib çıxaracaq.

Bu il Aİ-nin Azərbaycan rəhbərliyi ilə nəqliyyat layihələri üzrə, habelə təhlükəsizlik məsələləri ilə bağlı dialoq aparacağı barədə razılıq əldə olunub. Bakı və Brüssel arasında tərəfdaşlığın geniş istiqamətləri dairəsi üzrə belə intensiv görüşlər qarşılıqlı münasibətləri daha yüksək səviyyəyə qaldırır.

- Tərəflər arasında təhlükəsizlik məsələləri üzrə müzakirələr nə vaxt olacaq?

- Dəqiq tarix verə bilmərəm. İlk növbədə, gündəliyi və planlaşdırılan görüşün tarixini müəyyən etmək lazımdır.

- Məmmədyarov və Mogerini görüşünün iqtisadi və ticari aspektləri haqqında danışdınız. Bəs danışıqların siyasi bloku?

- Əməkdaşlıq Şurasının iclasında Qarabağ münaqişəsinin nizamlanması prosesinə, habelə demokratiya, qanunun aliliyi və insan hüquqları məsələlərinə toxunulub.

- Yəni Azərbaycanda insan hüquqlarının müdafiəsi, siyasi məhbuslar, jurnalistlərin təqibi ilə bağlı vəziyyət müzakirə olunub?

- Deyə bilərəm ki, bu mövzularda da açıq dialoq olub. Aİ üçün demokratiya, söz azadlığı sahəsində əsas prinsiplər mövcuddur, onlar çox vacibdir və biz onlara xüsusi diqqət yetiririk. Çətinlikləri dəf etmək və irəli getmək lazımdır. -0-