Dünya televiziya kanallarında Azərbaycanın ilk xəbər proqramı

Bakı/26.08.20/Turan: Hazırlıq mərhələsində bir neçə buraxılışdan sonra avqustun 30-dan İsveç İctimai televiziyasında Azərbaycanın həftəlik xəbər proqramının ardıcıl yayımı başlanır. Bu, Azərbaycanın dünya telekanallarında ilk xəbər proqramı olacaq. Hər biri 10 dəqiqəyədək davam edən verilişlər ingilis dilində hazırlanır, buraxılışlar əsasən Turan, Ayna-Zerkalo, Pressklub, qismən digər saytlarının materialları və süjetləri əsasında tərtib olunur.

Press Klubun sərdi Arif Əliyev yeni layihə barədə Turan agentliyinin suallarına cavab verir:

- Hər halda, sıradan bir layihə deyil. Onun başlıca məqsədi nədən ibarətdir?

- Əlbəttə, əsas məqsəd Azərbaycanın dünyada, konkret halda Skandinaviya ölkələrində daha yaxşı tanıdılması, problemlərimiz, uğurlarımız və hədəflərimiz barədə beynəlxalq auditoriyada düzgün təsəvvürlərin formalaşdırılmasıdır. Biz Azərbaycanda baş verən, regional və qlobal proseslərlə əlaqəli hadisələr barədə məlumatları da birbaşa, arada filtrlər olmadan həmin auditoriyaya çatdırmağa, bunun üçün xarici kanalların özlərinin geniş imkanlarından istifadə etməyə çalışırıq. Əminik ki, belə yanaşma Azərbaycana marağın və onun dostlarının artmasına kömək edəcək.

- Adətən, xarici kanallarda başqa ölkə haqqında verilişlər tarixi materiallardan ibarət olur, mədəniyyətə aid mövzulara həsr edilir. Burada da belədirmi?

- Xeyr, söhbət sözün tam mənasında xəbər proqramından gedir. Ötən 3 verilişimizdə, belə demək mümkünsə, test buraxılışlarında iqtisadiyyata, Qarabağ müharibəsinə, koronovirusla mübarizəyə, xarici, hətta daxili siyasətə aid mövzular üstünlük təşkil edirdi. Ortada yalnız iki tələb var: xəbərlər lokal xarakter daşımamalı, yəni, xarici auditoriya üçün də maraqlı olmalı və yüksək peşə standartlarına əməl edilməlidir.

- Bəs texniki cəhətdən proses necə baş verir?

- Xəbərləri burada seçirik, onların oxunuşunu və çəkilişləri Press Klub TV həyata keçirir, son montaj-tamamlama işlərini Stokholmda tərəfdaşımız İnternational Media Group-un SAMM TV kanalı görür və bazar günü axşam veriliş efirə gedir.

- İsveç İctimai Televiziyası ilə razılığa necə nail oldunuz?

- Burada aparıcı rol İnrernational Media Group-un sədri, eyni zamanda Press Klubun Skandinaviya bürosunun rəhbəri Rahim Sadıqbəyliyə məxsusdur. O, Diasporla İş üzrə Komitənin dəstəyi ilə əvvəllər də həmin televiziya ilə əməkdaşlıq edib və biz onda da əlaqəli fəaliyyət göstərirdik.  

- Sonuncu sual: layıhəni genişləndirmək fikriniz varmı?

- Biz ictimai yayım sistemi olan bir neçə digər ölkədə də İnrernational Media Group-la eyni plan üzərində işləyirdik. Təəssüf ki, bəzi səbəblərdən, o cümlədən koronovirusun yolları bağlaması hələlik imkanları məhdudlaşdırır.