Media-icmal 26.08.20

Azərbaycan-Türkiyə əməkdaşlıq perspektivinin genişlənməsi,  toy mərasimlərinin keçirilməsinin mümkünlüyü, “kupça”sız evlərin qeydiyyat problemi, qəzalı binada yaşamaq təhlükəsi və s. məsələlər medianın aparıcı mövzuları sırasındadır. 

Türkiyə-Azərbaycan: yeni əməkdaşlıq platforması

“Azərbaycan” qəzeti  “Azərbaycan və Türkiyə üçün birgə yeni iqtisadi layihələr perspektivi ortaya çıxıb sərlövhəli məqalədə Azərbaycan-Türkiyə iqtisadi əməkdaşlığını dəyərləndirir.

Müəllif  buna əsas kimi Qara dənizin Türkiyəyə aid milli sektorunda nəhəng təbii qaz yatağının aşkar edilməsini göstərir, həm də vurğulanır ki, Bakı-Tbilisi-Ceyhan, Bakı-Tbilisi-Ərzurum, TANAP, Bakı-Tbilisi-Qars layihələrində Azərbaycan və Türkiyə uğurlu tərəfdaş olublar.

İlkin hesablamalara görə, “Sakarya” adı verilən yataqdakı 320 milyard kubmetr qaz ehtiyatı orta hesabla 67 milyard ABŞ dolları dəyərindədir.

Müəllifə görə, yeni yatağın kəşfilə Türkiyə Qara dənizdən öz təbii yanacaq ehtiyatlarını aşkarlamaqla birmənalı şəkildə bölgənin enerji daşıyıcısı qovşağına çevrilir.

Xəzər dənizinin sahil ölkələrinin tükənməz ehtiyatlarını nəzərə alaraq mühakimə yürüdə bilirik ki, Azərbaycan və Türkiyə onilliklər boyu karbohidrogen ehtiyatların tranzit nəqliyyat açarını özündə saxlayacaq. Bu amil hər iki ölkənin birlikdə elektrik enerjisi ixracatçısına çevrilməsi üçün böyük perspektivlər yaradır.

Bu istiqamətdə iki qardaş ölkənin yeni layihələr həyata keçirmək, dünya elektrik enerjisi bazarında güclü yer tutmaq və eyni zamanda enerji mübadiləsi ilə bu sahəyə aid məhsullardan daha səmərəli istifadə etmək şansı yaranır.

Toylar keçirilə bilər, amma necə?

“Redaktor.az”  saytı “Toyların keçirilməsinə icazə verilə bilər” sərlövhəli məqalədə ölkədə toyların keçirilməsinin mümkünlüyü barədə yazıçı-kulturoloq Aydın Xan Əbilovla söhbətləşir.  

Toy biznesi çox geniş sahələri; ərzaq, moda, musiqi sənayesindən tutmuş, vergi və sosial sahələri özündə birləşdirir. Toy biznesinin məhv olmaması, kapital axınının qarşısının alınması üçün Azərbaycanda da toylara hansısa qaydada icazə verməlidir: “Hesab edirəm ki, müəyyən qayda-qanunlar əsasında toy və yas mərasimlərimiz bərpa olunmalıdır, yoxsa bizi çox böyük fəsadlar gözləyir”, - A.Əbilov bildirir.

Deputat Aqil Abbas da hesab edir ki, vəziyyət təhlil edilərək toylara icazə verilə bilər: “Düşünürəm ki, say, maska və sosial məsafə gözlənilməklə toylara icazə verilə bilər. Mən toyların keçirilməsindən yanayam. Çünki toy həm də böyük biznesdir. Heyvandarlıq, əkinçilik, balıqçılıq sahəsindən tutmuş, musiqi ansamblı, işçiləri, aşpazlığa qədər hamının zəhməti yerdə qalır”.

A. Abbas bildirib ki, hazırki şəraitdə yas mərasimlərinin keçirilməməsi az da olsa başa düşüləndir, belə ki, xalq artıq yas mərasimlərinin keçirilməsinə öyrəşməyə başlayıb. Yas yerini tez tərk etmək elə ən doğrusudur, çünki bu xəstəlik ən çox yas mərasimlərində yayılır”.

“Kupça”sız evlərin qetdiyyt problemi”   

“Metbuat.az” ''Kupçasız'' evlərə qeydiyyat problemi” sərlövhəli məqalədə isə Bakı və Abşeronda qeydiyyata düşmək problemindən bəhs edilir.

Müəllifə görə, Azərbaycan vətəndaşları ölkənin istənilən ərazisində qeydiyyata düşmədən istədikləri qədər yaşaya bilərlər: “Ancaq bu gün qeydiyyata düşmək o qədər qəliz prosesə çevrilib ki, daimi yaşayış yerini dəyişən şəxslər belə bu prosesdən keçməmək üçün, yaşayış yerlərini dəyişdirmək istəmirlər”. Bu gün Bakıda 10 ildən artıq yaşayan minlərlə ailə var ki, hələ də bu şəhərdə qeydiyyata düşə bilməyiblər” deyə müəllif vurğulayır.

Müəllifə görə, məsələnin digər bir tərəfi isə hazırda övladını birinci sinfə qəbul olunmaq üçün sənəd hazırlayan valideynləri narahat edir. Orta məktəblərin birinci siniflərinə şagird qəbulu ücün sənəd hazırlayan valideynlər qeydiyyat məsələsi ilə əlaqədar olaraq ciddi problemlərlə üzləşirlər. Tələb olunan sənədlərdən biri də şagirdin sənəd verdiyi məktəbə yaxın bir ünvanda qeydiyyatda olmasını təsdiq etməlidir.

Əmlak üzrə ekspert Elnur Fərzəliyev deyir ki, Bakı və Abşeron ərazilərində yüz minlərlə çıxarışsız evlər var, çıxarışın olmaması səbəbindən vətəndaşlar öz evlərinə qeydiyyata düşə bilmirlər.

Çıxış yolu isə ikidir: “… vətəndaş ya məhkəməyə müraciət etməli və yaxud da hansısa bir qeyri- qanuni sayılan əmələ əl atmalıdır. Qanunla ünvana qeydiyyata düşmə anlayışı həmin mülkə sahib olmaq demək deyil.

Yəni, vətəndaşın bir ünvanda qeydiyyatının olması onun o mülk üzərində mülkiyyət hüququna sahib ola bilməsi deyil.  Bu gün tək Bakı və Abşeronda qeydiyyatda olmadan milyondan artıq insan yaşayır”.

Ekstrimə dönən yaşayış

Oxu.az”  saytı “Bakıda binada yaşamaq ekstrimə çevrilib: “Qaçqınlar özləri məskunlaşıb... ona görə” sərlövhəli məqalədə müəllif Qaraçuxur qəsəbəsindəki 14B ünvanda yaşayan sakinlərin problemlərini araşdırır.

Müəllifin deməsinə görə, binanın həyətində su anbarı qəzalı vəziyyətə düşüb, amma təmir edilmir, binaya lift qoyulmaması, zirzəmilərdə kanalizasiya sularının yığılması sakinlərin ciddi narazılığına səbəb olub. Onlar dövlət qurumlarına olan  müraciətlərin cavabsız qaldığını deyirlər.

Sakinlər deyir ki, “həyətdəki böyük su anbarının üzərindəki beton plitələr aylar əvvəl dağılıb, nəticədə həyətin ortasında dərin bir quyu əmələ gəlib.

Təxminən 155 tonluq su anbarı hər an faciəyə səbəb ola bilər. Binanın zirzəmisində də acınacaqlı vəziyyət hökm sürür. Su anbarının örtüyünün dağılı və binadakı kanalizasiya sistemi sıradan çıxıb. ASC isə sakinlərə həmin problemin tezliklə aradan qaldırılacağını bildirib. Binada liftin olmamasına aydınlıq gətirən İcra Hakimiyyətindən deyilib ki, qaçqınlar özləri gəlib orada məskunlaşıblar: “Bina tam təhvil verilməyib. Bu səbəbdən də hazırkı vəziyyətdə oraya lift quraşdırmaq mümkün deyil”.