Əli İnsanov: “Bir tərəfdən, Ramiz Mehdiyevə Heydər Əliyev ordeni verirlər, digər tərəfdən, onu rüsvay edirlər”

Bakı/07.09.20/Turan: Artıq ikinci gündür ki, Haqq Ədalət Partiyası sədrinin köməkçisi Rəşad Abbaslı haqda məlumat yoxdur.

“Biz və valideynləri polisə  müraciət etdik, ancaq indyədək bizə cavab verməyiblər”, - Azərbaycanın keçmiş səhiyyə naziri Əli İnsanov “Amerikanın səsi”nə müsahibəsində bildirib. Məlum olan budur ki, onu günün günorta çağı mülki geyimli şəxslər oğurlayıblar. Valideynləri avtomobilin nömrəsini polisə veriblər, lakin Binəqədi Rayon Polis İdarəsinin 4-cü bölməsində ona deyiblər ki, hansı maşın olduğunu bilirlər və evə getməyi tövsiyə ediblər. “Bu, açıq şəkildə insan oğurluğudur”, - Ə.İnsanov qeyd edib.

O güman edir ki, onun köməkçisindən partiyanın maliyyələşdirilməsi, onun üzvləri və xaricdəki əlaqələri barədə məlumat tələb olunacaq.

“Hakimiyyətin geniş islahatlar şüarı haqda nə düşünürsünüz?” sualının cavabında Ə.İnsanov deyib ki, heç bir islahat yoxdur.

“Bu rejimin hərəkətlərini istədiyiniz kimi adlandıra bilərsiniz, ancaq bu, antidemokratik, repressiv və aqressiv rejimdir. Xalqı alçaldan və incidən rejimdir, onlar islahata qadir deyil”, - Ə. İnsanov deyib.

O həmçinin hakimiyyətin kadr siyasətini tənqid edib. “Bütün bu təyinatlar ciddi görünmür. Təcrübəsiz adamları yüksək vəzifələrə qoyurlar ki, onlar, sadəcə, İlham Əliyevin dediklərini təkrarlasınlar.

“Hakimiyyətin hərəkətləri, ümumiyyətlə, məntiqsizdir: onlar Heydər Əliyevə ən sadiq adamları cəzalandırırlar, onlardan biri Ramiz Mehdiyevdir. Əgər o, belə pis idisə, nə üçün bu yaxınlarda ona ölkənin ali mükafatı – Heydər Əliyev ordeni təqdim edildi?.

Hakim komandanın bütün köhnə üzvlərini mənim taleyim gözləyir - onları işdən çıxaracaqlar, sonra isə repressiyaya məruz qoyacaqlar və məhv edəcəklər”, - Ə.İnsanov deyib.

Ramiz Mehdiyev həmişə Rusiyanın tərəfdarı olub və onun orada möhkəm əlaqələri və ciddi dəstəyi var. Ancaq qəribədir ki, bu gün onu oradan dəstəkləmirlər. “Azərbaycan hakimiyyətinin hərəkətlərinə gəlincə, o, sadəcə, intihar edir. Mehdiyevin təqib edilməsi hakimiyyətin intihar prosesinin başlanğıcıdır”, - Ə.İnsanov qeyd edib.

Çıxış yolu müxalifətin konsolidasiyasında, ölkədə vətəndaş həmrəyliyinin yaranmasında və xalq etimad hökumətinin yaradılmasındadır. Müxalifət liderləri hakim YAP ilə birlikdə və İlham Əliyevin hakimiyyətdə qalması ilə etimad hökuməti yaratmalıdır. Yeni parlament və prezident seçkiləri keçirilməlidir. Əgər xalq bugünkü iqtidara səs verərsə, qoy, bundan sonra da idarə etsin, Ə.İnsanov belə hesab edir.

“İlk addım olaraq hakimiyyət Tofiq Yaqublunu və digər siyasi məhbusları azad etməlidir. AXCP-ni nə qədər repressiya etmək olar? Mən Əli Kərimlini dəstəkləyirəm və onun bütün tərəfdarlarının dərhal azad olunmasını tələb edirəm”, - o vurğulayıb.

Hakimiyyətin müxalifətlə dialoq çağırışları nə dərəcədə inandırıcı görünür? Keçmiş nazir bu sualın cavabında deyib ki, hakimiyyətlə yuxarıda təklif etdiyi formada dialoqa hazırdır. Qalan hər şey imitasiyadır”, - Əli İnsanov deyib. -03B