Erməni tərəfinə zərbə endirilməsi məsələsi konkretləşdirilməlidir - Zülfüqarov

Ermənistan prezidentinin müharibə bərpa olunacağı təqdirdə Azərbaycana raket zərbələri endirməyə hazır olduğu barədə aqressiv bəyanatlarından sonra rəsmi Bakı susmaqda davam edir.

Bakı Qarabağ separatçılarının keçmiş komandanı Arkadi Ter-Tadevosyanın birinci növbədə raket zərbələri endirilməli olan 12 infrastruktur hədəfi haqqında bəyanatından sonra da susub.

Azərbaycanın keçmiş xarici işlər naziri Tofiq Zülfüqarov hesab edir ki, ermənilərin misli görünməmiş aqressiv ritorikası aprelin 2-nə təyin edilmiş parlament seçkiləri ilə bağlıdır. Bununla belə, Azərbaycanın cavabı olmalı idi, deyə o, öz facebook səhifəsində yazıb.

Hərbi əməliyyatlar bərpa olunacağı təqdirdə rəqibləri təbliğat spekulyasiyalarından məhrum etmək üçün Azərbaycanın taktikasının hərbi-siyasi komponenti çox aktual və zəruridir, Zülfüqarov belə hesab edir.

Öz sözlərini “Azadlıq” radiosuna şərh edən Zülfüqarov qeyd edib ki, təmas xəttinin Ermənistan tərəfindən 3 komponentini qeyd etmək olar:

1. Dağlıq Qarabağ ətrafında işğal edilmiş ərazilərin vasitəçilər və beynəlxalq ictimaiyyət tərəfindən görülən tamamilə xüsusi statusu var. Gələcəkdə mümkün hərbi əməliyyatlarda bu ərazilər azad edilərsə, Azərbaycan tərəfin qanuni hərbi hədəfi kimi tanınacaq. Bu, o deməkdir ki, onlar itirildiyi təqdirdə nə KTMT ölkələri, nə də Rusiya Ermənistan tərəfi qurban hesab etməyəcək.

2. İkinci qrup ərazilər Dağlıq Qarabağın ermənilər məskunlaşan rayonlarıdır. Bu ərazilər hərbi əməliyyat yeri olarsa, bu halda ermənilər “qurban obrazı”ndan istifadəni artıracaq və Azərbaycanın ünvanına tənqid artacaq.

3. Ermənistan ərazisi qonşu dövlətin ərazisidir və Azərbaycanın ona qarşı təhrik olunmamış əməliyyatları həm KTMT çərçivəsində, həm də Ermənistan və Rusiyanın müttəfiqlik münasibətlərinin parametrləri çərçivəsində müzakirə predmeti ola bilər.

Yuxarıda deyilənləri nəzərə alaraq, Azərbaycanın mövqeyinin hərbi-siyasi komponentinin konkretləşdirilməsi həddindən artıq aktual görünür və təbliğat müharibəsində mühüm qabaqlayıcı addım ola bilər.

“Azərbaycan rəhbərliyi Azərbaycan SQ-nin hərbi cavab tədbirlərinin şamil oluna biləcəyi hər bir ərazi qrupu üzrə siyasi və hərbi niyyətini açıq-aşkar bəyan etməlidir”, deyə Zülfüqarov qeyd edib.

Bunu necə etmək olar? – sualına cavabda sabiq nazir bildirib ki, bunu Azərbaycan SQ-nin Ali Baş Komandanının hərbi-siyasi direktivi və ya ölkənin təhlükəsizlik konsepsiyasının bir hissəsi edə bilər.

Bu sənəd açıq olmalı, rəsmi mövqe kimi KTMT üzvü olan ölkələrə, Minsk Qrupunun həmsədri və iştirakçısı olan ölkələrə, sənəd hərbi xarakterli olduğu üçün NATO, ATƏT üzvü olan ölkələrə və əlbəttə ki, BMT-yə göndərilməlidir, çünki Azərbaycanın cavab tədbirləri BMT Nizamnaməsinin müddəaları ilə tənzimlənəcək.

Sənədin mətnində aşağıdakı prinsiplər üzrə Azərbaycan SQ-nin addımlarını müəyyən edən konkret müddəalar yer almalıdır:

Düşmən ərazilərimizin 1-2 km-dən çox dərinliyinə zərbə endirərsə, Azərbaycanın cavab tədbirlərinin necə olacağını müəyyən etmək. Aydındır ki, belə olan halda atəş nöqtələrinin məhv edilməsi üçün Azərbaycanın hücum tədbirləri yuxarıda 1-ci bənddə göstərilən ərazilərdə olacaq.

Ermənilər Azərbaycan ərazilərinin 5-10 km dərinliyində yaşayış məntəqələrinə zərbə endirdiyi təqdirdə Azərbaycanın cavabı fərqli olmalıdır.

Nəhayət, Ermənistan tərəfdən Azərbaycan və Naxçıvan MR-nin yaşayış məntəqələrinə, həyat təminatı obyektlərinə zərbə endiriləcəyi təqdirdə, Azərbaycanın cavabı tamamilə fərqli olmalıdır. Belə olan halda Azərbaycan ordusunun hədəfləri Ermənistan ərazisinə keçə bilər.

“Azərbaycan ordusunun əsas vəzifəsi düşmənin Azərbaycanın dinc əhalisinin həyat və təhlükəsizliyini şübhə altına qoyan atəş nöqələrini məhv etməkdir. Həm də cavab tədbirləri, Ermənistan tərəfin dinc əhalisinin təhlükəsizliyi nəzərə alınmaqla, assimetrik və qabaqlayıcı olacaq”, deyə Tofiq Zülfüqarov qeyd edib. -02D-