Fikrət Hüseynli Ukdaynada 6 aylıq "dustaqlığı" haqqında

Bakı/19.04.18/Turan: "Ukraynanı quru sərhədindən tərk edə bildim. Bu, məcburi tədbir idi, çünki Kiyev aeroportunda məni həbs etməyi planlaşdırırdılar", bu barədə bir neçə il əvvəl Niderlanddan sığınacaq və vətəndaşlıq alan jurnalist Fikrət Hüseynli "Amerikanın Səsi" radiosunun Azərbaycan xidmətinə müsahibəsində bildirib.

O xatırladıb ki, Kiyev prokurorluğu məhkəmənin onun pasportunun qaytarılması haqqında qərarını sabotaj edirdi və Bakının jurnalistin Azərbaycana ekstradisiyası haqqında sifarişini yerinə yetirmək üçün Kiyevdə onu hər yolla saxlamağa çalışırdı.

"Aprelin 16-da məhkəmənin növbəti iclasında Niderland səfiri və bu ölkənin daha üç diplomatı, Avropa İttifaqının Kiyevdəki missiyasının nümayəndələri, yerli hüquq müdafiəçiləri və jurnalistlər iştirak edib.

Hakim yenə prokurorluğun tələbini yerinə yetirməkdən imtina edib, bundan sonra prokuror hakimdən pasportumu almaq istəyib. Amma mən pasportu götürdüm və məhkəmənin onun mənə qaytarılması haqqında qərar qəbul etdiyini bildirdim", deyə jurnalist qeyd edib.

Zalda iştirak edən diplomatlar Hüseynliyə bildiriblər ki, prokurorluğun sərəncamına əsasən ölkəni tərk etməyə cəhd edərsə onu həbs edəcəklər.

Hüseynli məhkəmə zalından çıxdıqda izlənildiyini hiss edib, çox qısa müddət sonra isə gizli nömrədən naməlum şəxs ona zəng edərək, Ukraynanın ona məzar olacağı ilə hədələyib.

Jurnalist ABŞ və Avropa İttifaqı nümayəndələrinə müraciət edərək kömək istəyib. "Bundan sonra mənə Ukraynanı necə tərk edə biləcəyimi izah ediblər", deyə Hüseynli bildirib. Təfsilatını açıqlamayan jurnalist bildirib ki, ölkənin quru sərhədində bir nəzarət-buraxılış məntəqəsindən keçib.

O qeyd edib ki, sərhədi qanuni yolla keçib. "Ölkədə qalma müddətini pozduğuma görə 25 avro cərimə ödədim və pasportuma ştamp vurdular", deyə o bildirib.

"Berlinə çatdıqda mənə kömək edən şəxslərə təşəkkür etdim və Amsterdama evimə yola düşdüm", deyə Hüseynli bildirib.

Ukraynanı tərk etməsinə məhz kimin kömək etdiyi barədə suala cavabda jurnalist yalnız onların "çox yüksək vəzifəli şəxslər" olduğunu və adlarını açıqlamamağı xahiş etdiklərini bildirib.

6 ay Ukraynada saxlanması ilə bağlı danışan Hüseynli bildirib ki, prokurorluğun əməllərindən şikayətlə Avropa İnsan Hüquqları Məhkəməsinə müraciət etmək niyyətindədir.

Jurnalist beynəlxalq təşkilatların, Ukrayna ictimaiyyətinin, ABŞ, Niderland və Avropa İttifaqının Kiyevdəki səfirliyinin nümayəndələrinə, Ukrayna deputatlarına göstərdikləri dəstəyə görə təşəkkür edib.

"Onların köməyi və dəstəyi sayəsində ədalətsizliyə qanuni yolla qalib gələ bildim", deyə jurnalist sonda bildirib.

* Hüseynli 14 oktyabr 2017-ci il tarixində Kiyevdən Düsseldorfa uçarkən Azərbaycanın İnterpol xətti ilə verdiyi sorğu əsasında saxlanılıb. Azərbaycanda o, fırıldaqçılıqda və sərhədi qanunsuz keçməkdə ittiham olunur.

2017-ci il oktyabrın 18-də Ukraynanın Borispol şəhər məhkəməsi jurnalistin Azərbaycana ekstradisiyası məsələsinə baxmaq üçün onu 18 gün müddətinə həbs edib.

Oktyabrın 27-də Kiyevin Lukyanovski Məhkəməsi Ukrayna Ali Radasının deputatı Mikola

Knyajitskinin və ictimai xadim Boris Zaxarovun zaminliyi ilə Fikrət Hüseynlini azad edib. Eyni

zamanda, məhkəmə dövlət ittihamçısının Fikrət Hüseynlinin Azərbaycana ekstradisiyası

haqqında vəsatətini təmin etməyib.

Kiyev Vilayət Prokurorluğu Fikrət Hüseynlinin azad edilməsindən apellyasiya şikayəti verib

və onun həbs edilməsini tələb edib. Protest üzrə məhkəmə yanvarın 17-də başlayıb, ancaq 4 dəfə təxirə salınıb. Nəhayət, fevralın 13-də məhkəmə ekstradisiyadan imtina edib.

Bununla birlikdə, martın 16-da prokurorluq ekstradisiya yoxlaması müddətinin daha iki ay uzadılması barədə vəsatət qaldırıb. Amma Kiyevin Piçerski məhkəməsi yalnız aprelin 2-nə qədər vaxt verib. Bu müddət başa çatdıqdan sonra məhkəmə ekstradisiya yoxlamasını dayandırmaq və Hüseynlinin ölkəni tərk etməsinə icazə vermək barədə qərar çıxarıb. -03B-