Keçmiş siyasi məhbus həbsxanalarda işgəncələr, korrupsiya və ədalətsizlik barədə

Bakı/18.08.20/Turan: Həbsxana qayda-qanunları yalnız siyasi məhbuslara, müəyyən peşə fəaliyyətinə görə həbs edilənlərə və sosial durumu zəif olan insanlara şamil olunduğundan qədər ədalətsiz görünür. Bu barədə bu gün azadlığa çıxan AXCP fəalı Fuad Əhmədli Turan-a müsahibəsində deyib.

“Azərbaycanın bugünki cəzaçəkmə müəssisələri özəl bir holdinq, şirkət formasında fəaliyyət göstərir. Maddi vəsait hər şeyi həll etdiyinə görə ədalətsiz  görünür. Bu gün Azərbaycan necə idarə olunursa həbsxanalar da elə idarə olunur”, - F.Əhmədli deyib.

4 il cəza çəkdiyi 16 saylı koloniyada vəziyyətə toxunan fəal bunları qeyd edib:  “Həbsimin ilk günlərində məhbusları necə dəyənəklə döydüklərini görmüşəm. Onların qışqırtıları eşidilirdi. Qollarında qandal insanları döyürdülər, etməli işi etiraf etmələrini tələb edirdilər. Bəzi müəssisə rəhbərliyi məhbusu iki yaruslu çarpayıda birinci və ya ikinci mərtəbələrə bağlamaqla eyni işgəncələrə məruz qoyurdu.

Şəxsən mənə qarşı bu cür təzyiq forması olmasa da fiziki zorakılıqlarla bağlı çox halla rastlaşmışam”.

O əmin olduğunu bildirib ki,  Ombudsman Aparatı və  Beynəlxalq Qırmızı Xaç Komitəsi bəzi hallarda həbsxanalarla bağlı qeyri-obyektiv hesabatlar verir.

F.Əhmədli saxlanıldığı 16 saylı cəzaçəkmə müəssisəsində koronavirusa yoluxanların olmadığını bildirib. Onun firkincə, cəzaçəkmə müəssisəsində məhbus sıxlığı çoxdur və bu, soslal məsafənin qorumasına təminat yaratmır. Məhbus sıxlığından yoxlamar zamanı məhbuslar arasında məsafə 10-15 santimetdən çox olmur. Eyni hal məhbusların yaşadığı yataqxanalardakı çarpayılar arasında da var.  

AXCP fəalı cəzaçəkmə müəsissəsində rüşvət halları barədə də danışıb. Onun sözlərinə görə, cəzaçəkmə müəssisəsinin tibb məntəqəsində bir ay qalmaq üçün 250-400 manat rüşvət tələb olunur. Həmçinin ailə ilə telefon danışığı, evdən gələn ərzağın mətbəxdə istifadəsi, əlavə hamam xidmətləri üçün də pul ödəmək lazımdır.

Penitensiar Xidmətin nümayəndəsi F.Əhmədlinin  fikirlərini şərh edərkən bu ittihamları rədd edib.

“Cəzaçəkmə müəssisələrində saxlanma mövcud qanunvericiliyə və daxili intizam qaydalarına uyğundur. İşgəncə və rüşvət faktları ilə bağlı deyilənlər isə uydurmadır. Əgər kimsə belə faktlarla rastlaşıbsa Penitensiar Xidmətə müraciət edə bilər”,- qurumun nümayəndəsi deyib.06D-