KİV öz təsirini itirməyə davam edir - Mehman Əliyev

Bakı/19.07.18/Turan: Azərbaycan mətbuatı ağır vəziyyətdədir və vəziyyət getdikcə daha da pisləşir. Bu fikri iyulun 22-də qeyd edilən Milli Mətbuat Günü ərəfəsində Turan İnformasiya Agentliyinin direktoru Mehman Əliyev bildirib.

Onun fikrincə, son bir ildə mənfi təmayüllər daha da güclənib. Mətbuat getdikcə öz təsirini daha çox itirir, reklam bazarı isə iki dəfə azalıb. Belə ki, ötən il ərzində bütün KİV-lərə düşən reklam həcmi 4 mln. manat təşkil edib. Bu məbləğin 3,5 milyon manatı telekanalların, qalan 500 min manat onlayn mətbuatın, çap KİV-lərinin və radionun payına düşüb.

"Bu, çox kiçik həcmdir və bu vəsaitlə mətbuatı saxlamaq və inkişaf etdirmək qeyri-mümkündür. Digər tərəfdən, bu, mətbuatın oxucu və tamaşaçı auditoriyasının çox az olmasının göstəricidir. Buna görə şirkətlər də reklam vermir və ya çox aşağı qiymətlə verir", deyə o qeyd edib.

Bu fonda sosial şəbəkələrin fəallığı genişlənir və bu gün sosial medianın öz təsirinə görə ənənəvi mediadan üstün olduğunu qeyd etmək olar.

Həbs edilmiş jurnalistlərin azad edilməsi sahəsində vəziyyət necədir? Bu suala cavabda Əliyev deyib ki, vətəndaş cəmiyyəti bu vəzifənin həlli üçün səy göstərir: tədbirlər keçirir, bəyanatlar verir, çağırışlar edir. Amma Azərbaycan hökuməti inhisarın və media üzərində siyasi nəzarətin saxlanması siyasətini davam etdirir.

"Bu vəziyyətdə jurnalistlərin azad edilməsinə nail olmaq, yeni həbslərin qarşısını almaq çox çətindir. Hakimiyyət jurnalistlərin qatillərinin axtarışına, onların məhkəməyə verilməsinə maraq göstərmir", deyə o qeyd edib.

Əliyev həmçinin hökumətin saytların enerji böhranını və Gəncə hadisələrini işıqlandırmasına reaksiyasını tənqid edib.

"Bir sıra saytlar barəsində cinayət işləri açılır, redaktorlar istintaqa cəlb edilir, saytlar bloklanır. Media yalan məlumat yaymaqda, vəziyyəti gərginləşdirməkdə ittiham olunur.

Amma bu vəziyyətin ortaya çıxmasına görə dövlət məsuliyyət daşıyır. Hökumətdə baş nazirin başçılıq etdiyi fövqəladə hallar komissiyası var. Komissiya dərhal yığışıb, ictimaiyyətə və KİV-ə vaxtlı-vaxtında məlumat verməli idi. Bu, edilmədi, buna görə də sosial şəbəkələrdən müxtəlif şaiyələr və nəşrlər yayılır. Kimsə nə isə görüb, eşidib...

Jurnalistlər nə varsa, onunla işləyirlər. Bu vəziyyətə görə jurnalistlər deyil, hökumət məsuliyyət daşıyır", deyə Əliyev bildirib.

Media problemlərinin həlli yolları haqqında suala cavabda Əliyev bildirib ki, xarici mətbuatla müqayisədə Azərbaycan mətbuatının keyfiyyəti kəskin şəkildə aşağı düşüb. Çap KİV-lərinin məzmun, poliqrafiya və dizayn səviyyəsi həddindən artıq aşağıdır.

Bu məsələlərdə Azərbaycan KİV-ləri türk həmkarlarından xeyli geridə qalırlar.

Hazırki reklam bazarı və iqtisadi vəziyyəti nəzərə alsaq, KİV-in inkişafı haqqında danışmağa dəymir.

Vəziyyətin dəyişməsinə gəlincə, qanunvericilikdən başlamaq lazımdır. Vəziyyətin pisləşməsi məhz qanunvericiliyin sərtləşdirilməsindən və məhdudiyyətlərin tətbiqindən başlayıb. Belə ki, son illər KİV və İnternet haqqında qanunvericiliyə bir çox məhdudiyyətlər daxil edilib. "Mətbuatın iqtisadi vəziyyətinin yaxşılaşdırılması üzrə tədbirlər görülməlidir ki, onlar normal rəqabət şəraitində inkişaf etsinlər. Fövqəladə hallarda informasiya əldə etmək və mətbuatın işi məsələsi həll edilməlidir", deyə o bildirib.

Əliyev həmçinin jurnalistlərin peşə fəaliyyətinə görə həbsi imkanını aradan qaldıracaq diffamasiya haqqında qanunun qəbul edilməsi zərurətini qeyd edib.

"Nəhayət, mətbuatın dövlət və cəmiyyət arasında kommunikasiya rolu oynadığını nəzərə alaraq, hakimiyyət və mətbuat arasında normal münasibətlər qurulmalıdır. Bu, çox vacibdir", deyə Əliyev qeyd edib. -06D-