Novruz Məmmədov Qərb barəsində ritorikasını dəyişir və xüsusi münasibət tələb edir

Göründüyü kimi, rəsmi Bakı Qərb dövlətlərinə qarşı mövqeyini düzəldir, qəzəbli-qıcıqlandırıcı tonunu təmkinlə əvəz edir.

Azərbaycan Prezident Administrasiyası rəhbərinin müavini Novruz Məmmədovun keçirdiyi mətbuat konfransından belə bir nəticə çıxır.

Xüsusən, o bildirib ki, Avropa İttifaqı Şurasının prezidenti Donald Tuskun iyulun 22-də Bakıya baş tutmuş səfəri Azərbaycan-Aİ münasibətlərində “mühüm hadisə oldu”.

Tuskun səfəri hələ 21-22 iyun Avropa Oyunları zamanı planlaşdırılırdı, amma Yunanıstanda böhranla əlaqədar ləğv edilib, deyə Məmmədov bildirib (baxmayaraq ki, diplomatik mənbələrə əsasən, Tuskun səfəri iyulun 18-nə planlaşdırılırdı və Bakının Avropa Oyunları ərəfəsində siyasi məhbusları azad etməkdən imtina etməsi ilə əlaqədar ləğv edilib – red.).

Daha sonra Məmmədov etiraf edib ki, ilin əvvəllərindən Bakıda Avropa Qurumlarına qarşı sərt iradlar var idi.

“Biz deyirik ki, əgər biz strateji sahələrdə əməkdaşlıq ediriksə, sizdən müvafiq qiymət gözləyirik. Təəssüf ki, biz uzun müddət gözlədik, amma siz bu münasibətləri görmədiniz. Həm də Avropa qurumlarına kiçik iradlar etdikdə, müxalifətçilər və QHT-lər iddia edir ki, dünya dağılıb...

Qoy onlar onları maliyyələşdirən sahiblərinə xidmət etsinlər, amma Azərbaycan vətəndaşı olduqlarını unutmasınlar. Bütün bu müddət ərzində onlar Avropa qurumlarından Qarabağ məsələsində ədalətli mövqe nümayiş etdirməyi tələb etməyiblər, bu günə qədər qaçqınların və məcburi köçkünlərin hüquqlarının pozulması haqqında bir kəlimə belə etməyiblər”, deyə Məmmədov bildirib.

Onun iddiasına görə, Azərbaycan Assosiasiya Sazişinə ona görə qoşulmayıb ki, sənəddə ərazi bütövlüyünə dəstək ifadə edilməyib, baxmayaraq ki, Moldova, Ukrayna və Gürcüstanla müqavilələrdə belə bir maddə var.

Eyni zamanda, Məmmədov diqqət çəkib ki, Tusk Bakıya səfəri zamanı Avropa İttifaqının Azərbaycanın ərazi bütövlüyünü, müstəqilliyini dəstəklədiyini bildirib: “Biz Avropa İttifaqı ilə 20 ildir ona görə əməkdaşlıq etməmişik ki, indi özümüzü çəkək və əməkdaşlıq etmək istəmədiyimizi göstərək. Amma biz Azərbaycanın ərazi bütövlüyü, qaçqın və məcburi köçkünlər məsələləri üzrə ədalətli mövqe gözləyirik”, deyə Məmmədov əlavə edib.

“Prezident İlham Əliyevlə görüşdən sonra Donald Tusk bildirib ki, Aİ Azərbaycanın ərazi bütövlüyünü və suverenliyini dəstəkləyir. Biz bu qiyməti uzun yol qət etdikdən sonra almışıq”, deyə Məmmədov bildirib.

Bununla belə, Bakı Aİ ilə “Şərq Tərəfdaşlığı”nın ümumi formatının çərçivələrindən kənara çıxan xüsusi münasibətlər tələb edir. “Biz Avropa İttifaqı ilə strateji tərəfdaşlıq haqqında müqavilə üzərində işləyirik”, deyə Məmmədov bildirib.

ABŞ və Avropa İttifaqı bildirib ki, Azərbaycan mühüm tərəfdaşdır və Riçard Hoqlandın səfəri də eyni atmosferdə keçib. “ABŞ-dan gələn enerji məsələləri üzrə nümayəndə heyəti də münasibətləri inkişaf etdirmək arzusunu bildirib.

Almaniya tərəfdən də belə bir təklif daxil olub və biz razılıq cavabı vermişik. Amma onu da demək istəyirəm ki, biz mövqeyimizə sadiqik, bizə qarşı münasibət dəyişməlidir”, deyə Novruz Məmmədov onuncu dəfə təkrar edib. -06D-