Türkiyənin tanınmış yazarı: ”Nuri Paşa barədə əsərlərə göstərilən münasibət bizi üzür”

Turan İnformasiya Agentliyinin suallarını cavablandıran Hasan Yiğit, gənclər üçün qələmə aldığı “Gec ucaldılan abidə” kitabının Türkiyədə rəğbətlə qarşılandığını deyib.

Turan: Atilla Oralın `Nuri Killigil` kitabı Türkiyədə olduğu kimi Azərbaycanda da Bakını işğalçılardan xilas etmiş Nuri Paşa barədə həqiqətləri gün işığına çıxardı. Kitab Türkiyədə alimlər və ənənəvi oxucu kütləsi  necə qiymətləndirmişdi?

Yiğit: Atilla Oral mənim yaxın dostum idi. Yanılmıramsa, sizi də mən tanış etmişdim.

Turan: Bəli. 2015-ci ilin sentyabrında siz onun barəsində danışan kimi mən xahiş etmişdim ki, tanış edəsiniz.

Yiğit: Tanış etməkdən məmnuniyyət duymuşdum. Çünki Atilla uzun müddət `Nuri Paşa` kitabı üçün material toplasa da kitabı yazmağı yubandırırdı. Türkiyə və Azərbaycan mətbuatına verdiyi müsahibələr böyük maraq doğurunca kitabı sürətlə yazıb qurtardı. Başda Ənvər Paşanın varisləri olmaqla, Türkiyənin elmi dairələri və bu mövzuya maraq göstərən oxucu kütləsi kitabı bəyəndi. Yanılmıramsa, o vaxt Atilla kitabın Bakıda təşkil edilən imza mərasiminəə də getmişdi. Danışırdı ki, Bakıda Nuri Paşa adı altnda oxuculara təqdim edilən fotoların çoxu Nuri Paşa deyildi. Kitab bir çox nöqsanın aradan  qadırılmasına səbəb oldu.

Turan: Atilla Oral “Bakının işğaldan xilası” adlı bir kitab da yazacaqdı ancaq ömrü vəfa etmədi...

Yiğit: Atillanın ən böyük layihəsi Balkan savaşlarıyla bağlı idi. O kitabı yazmaq üçün təxminən 2000 foto əldə etmişdi. Onun günü kitab-foto hərraclarında, arxivlərdə, bukinistlərdə keçirdi. Ancaq son layihəsini reallaşdıra bilmədən dünyadan getdi. Türkiyə üçün də Azərbaycan üçün də çox böyük işlər gördü.

Turan: Ancaq Azərbaycan onun `Nuri Paşa` kitabını 5 ildir ki, çap etmir.

Yiğit: Bu, Atillanın ölümü qədər təəssüf doğuran bir haldır. Müstəqil dövlətə ən böyük hərbi dəstəyi vermiş və paytaxtını xilas etmiş tarixi bir şəxsiyyət barədə qələmə alınmış kitabın çap edilməməsinin hansı bəhanəsi ola bilər?

Turan: 2019-cu ildə Nuri Paşanı məzarı başında anarkən siz onun haqqında gənclər üçün yazdığınız “Gec ucaldılmış abidə” kitabınızı qəbristana gələnlərə hədiyyə vermişdiniz...

Yiğit: Açığını deməliyəm ki, mən o kitabı əziz dostum Atillanın və sizlərin gördüyünüz işlərdən təsirlənərək yazmışam. Məqsədim Nuri Paşanı təkcə Türkiyə yox, həm Azərbaycan gəncliyinə tanıtdırmaq idi. Türkiyədə böyük ölçüdə hədəfimə çatdığımı deyə bilərəm. Türkiyənin litseylərində kitabımın imza mərasimləri oldu, gənclərin Nuri Paşaya bu qədər maraq göstərməsi məni çox məmnun edir.

Turan: Kitabınız çıxanda agentliyimizdə də xəbər yazmışdıq. Azərbaycandan kitabınıza maraq göstərən nəşriyyat oldumu?

Yiğit: Düzünü demək lazımdırsa, mən kitabımı maraq göstərilməsi məqsədiylə yazmadım. Ancaq maraq göstərilsəydi, sevinər və qonorar istəmədən çapına razılıq verərdim. Uzaqdan müşahidə etdiyimə görə, Azərbaycanda toplum Nuri Paşaya böyük maraq göstərsə də səlahiyyətli şəxslər onun adının gündəmə gəlməsini arzulamırlar. Bunu anlamaq mümkün deyil. Axı bu adam və  komandanlıq etdiyi ordu Azərbaycan öz müstəqilliyini elan edən kimi  o müstəqilliyi qeydsiz-şərtsiz dəstəkləməklə qalmayıb, paytaxtı da xilas edərək dövlətin Bakıya köçməsinə müvəffəq olub. Aldığım məlumata görə, Bakıda nəinki heykəli, büstü belə yoxdur. Ancaq biz 15 sentyabr 2017-ci ildə İstanbulda Nuri Paşanın adının verildiyi parkı da açdıq. 59 yaşında həyata gözlərini yuman əziz dostum Atilla Oral kitabın Bakıda çapını çox istəyirdi, ancaq çıxmadı. Heç olmasa, 44 günlük müharibə vaxtı Türkiyə-Azərbaycan hərbi əməkdaşlığını nəzərə alaraq, Atilla Oralın 5 ildən bəri çapa hazır olan kitabını indi çıxarsınlar.

Turan: Bir yazıçı və naşir kimi öz işləriniz barədə məlumat verə bilərsinizmi?

Yiğit: İndiyə qədər çoxu  uşaqlar üçün nəzərdə tutulan 300-dən çox kitab yazmışam. Sahibi olduğum nəşriyyatın infrastrukturunu gücləndirmişəm, kitablarım həm mağazalarda, həm internet saytımdan, həm də Trendyol vasitəsiyylə satılır. Bu yaxınlarda silsilə kitablarım çıxacaq. Türkiyədə təhsilin inkişaf etdirilməsi üçün layihələr hazırlamışam, onları həyata keçirməyə çalışacağam.