Üzeyir Cəfərov: �Zaman bizim əleyhimizədir�

Azərbaycan Müdafiə Nazirliyinin ehtiyatda olan polkovnik-leytenantı bu günlərdə sosial şəbəkələr vasitəsilə ölkə jurnalistlərinə müraciət edərək ordudan uzaq “ekspertlər”in fikirlərini dərc etməməyi, Ermənistan KİV-lərin xəbərlərini yayarkən ermənilərin hiyləgər təbliğatlarına  uymamağı xahiş edib.

Azərbaycan ordusunda baş verən hər şeyi ictimaiyyətə açıqlamaq olmaz və ermənilərin öyündükləri hər şey də gerçək deyil, o yazıb.

Üzeyir Cəfərov Turan-a müsahibəsində Qarabağ münaqişəsinə dair son hadisələri şərh edib.

Keçmiş Baş Qərargah rəisi erməni Xaçaturovun KTMT-nin baş katibi təyin edilməsinə toxunan Ü.Cəfərov qeyd edib ki, Y.Xaçaturovun təyinatı gözlənilməz olub, çünki 2016-cı il aprel hadisələri zamanı özünü çox pis aparıb.

KTMT özü amorf təşkilatdır və mövcud olduğu müddətdə keçmiş İttifaq məkanında özünü bir dəfə  də olsun göstərməyib, halbuki, bu ərazidə çoxsaylı münaqişələr olub.

Əgər ermənilər güman edirlər ki, Azərbaycan separatçılara qarşı antiterror əməliyyatına başlayarsa  KTMT müdaxilə edəcək, bu, olmayacaq.

Belarus, Qazaxıstan və digər ölkələr bunu dəstəkləməyəcək. Odur ki, KTMT-nin Qarabağda rolu qapanıb. Xaçaturovun KTMT-də təyinatı heç nəyi dəyişmir.

Erməni tərəfə “İsgəndər” raketlərinin, “Verba” zenit-raket komplekslərinin, HHM sistemi də daxil olmaqla, digər silah və texniki vasitələrin göndərilməsi ilə bağlı nə deyərdiniz?  Bu, o deməkdirmi ki, Azərbaycan üçün Qarabağı geri almaq ehtimalı sıfıra yaxınlaşır?

Bu sualın cavabında Ü.Cəfərov deyib ki, erməni generalları on ildən çoxdur ki, Mingəçevir SES, Bakı-Tbilisi-Ceyhan neft kəməri və digər strateji obyektlərə zərbə endirməyə hazır olduqlarını bildirirlər.

Onlar dəfələrlə Bakını məhv edərək Kürə qədər gəlib çıxacaqları ilə hədələyiblər. Onlardan biri Azərbaycanı Ermənistan istehsalı olan nüvə silahı ilə qorxudub.

Ancaq bu adamlar unudurlar ki, Yerevandan Bakıya, hətta Mingəçevirə məsafə Naxçıvandan Ermənistanın paytaxtna qədər olan məsafədən iki dəfə çoxdur. Ora cəmi 43 kilometrdir.

Onların raketləri Bakıya çatana qədər “Qasırğa” adlanan raket kompleksləri Yerevanı daha tez dağıdacaq.

Azərbaycanın müasir HHM kompleksləri var ki, erməni raketlərini tutmağa qadirdir.

Özünü Qafqazın ən “güclü ordusu” adlandıran erməni ordusunun “döyüş keyfiyyətləri”ni 2016-cı ilin aprelində hamı gördü.

Miqyaslı korrupsiya faktları açıldı və məlum oldu ki, onlarda tank və ya digər texnika üçün benzin, rabitə vasitəsi, hətta əsgərlər üçün kaska olmayıb. Ancaq 2016-cı ilədək Yerevandan daha “dəhşətli xəbərdarlıqlar” gəlirdi.

Dinc nizamlanmaya nə kimi ümidlər var?

Ü.Cəfərov bu suala pessimist cavab verib. ATƏT və Minsk Qrupu çoxdan tükəniblər və onların vasitəçiliyinə ümid etmək, sadəcə, vaxt itirməkdir, Ü.Cəfərov bildirib.-0—