DEVAMM ictimai-siyasi mühitdə durumun pisləşməsindan narahatdır

Dini Etiqad və Vicdan Azadlıqlarının Müdafiə Mərkəzi (DEVAMM) son dövrdə ölkə ictimai-siyasi mühitində problemlərin artması ilə bağlı bəyanatla çıxış edib.

Sənəddə son dövrlərdə ölkənin ictimai-siyasi mühitində insan haqları ilə bağlı vəziyyətin pisləşməsinin müşahidə olunduğu nəzərə çatdırılır. Onsuz da gərgin olan durumun ictimai fəallara qarşı təqib və təzyiqlərin kəskin artması ilə yeni gərginlik fazasına keçməsilə müşaiyət olunmasına diqqət çəkilir.

Bu gərginliyə nümunə kimi müəlliflər həbsdə olan islam piartiyasının sədri Mövsüm Səmədovun karserə salınmasını, ilahiyyatçı Taleh Bağırova qarşı zorakılıq və onun ölümlə hədələnməsini göstərir. Bundan əlavə, vətəndaş cəmiyyəti fəallarından Mustafa Hacıbəylinin 15 sutka müddətinə inzibati cəza alması, keçmiş nazir İsgəndər Həmidovun polis təzyiqinə məruz qalması, tanınmış vəkil Aslan İsmayılovun təhqir və zorakılıqla üzləşməsi nəzərə çatdırılır. Müxalifət partiyalarının tədbirlərinə qanunsuz müdaxilələr, Müsavat Partiyası başqanı İsa Qəmbərin avtomobilinin cərimə meydançasına aparılması, REAL sədri İlqar Məmmədovun həbsdə karserə salınması qeyd edilir. “Bütün bunlar - insan haqlarının kobud surətdə pozulması, qanunçuluğun və hüququn ziddinə olan hərəkətlərdir və DEVAMM bunlardan ciddi narahat olmaqla yanaşı, bu ortama etirazını ifadə edir”, - deyə sənəddə qeyd olunur.

Müəlliflər belə durumu ölkəni geriyə aparan amil sayaraq, qanunun aliliyinə alternativ olmadığı yada salınır. -05D-