Manatın devalvasiyası: gözləntilər və gerçəkliklər

Azərbaycanda neft gəlirlərinin azalması fonunda həm tənzimlənən, həm də bazar qiymətlərinin artımı manatın  devalvasiyası ilə bağlı gözləntiləri çoxaldır.

01 iyul 2024-cü ildə president Əliyev “Azərbaycan Respublikasının 2024-cü il dövlət büdcəsi haqqında” Azərbaycan Respublikasının Qanununda dəyişiklik edilməsi barədə Azərbaycan Respublikasının Qanunu[1] imzalayıb.

2023-cü il üçün yenidən baxılmış  dövlət büdcəsinin xərcləri 36 milyard 624,8 milyon manat proqnoza qarşı 36 milyard 458 milyon manat təşkil edib və icra səviyyəsi 99,5 faiz olub. Büdcənin hər 100 manatından 25 manat 60 qəpiyi iqtisadi fəaliyyətə, 16 manat 10 qəpiyi müdafiə və milli təhlükəsizliyə, 11 manat 70 qəpiyi sosial müdafiə və sosial təminata, 11 manat 30 qəpiyi təhsilə, 10 manat 30 qəpiyi ümumi dövlət xidmətlərinə, 7 manat 30 qəpiyi məhkəmə hakimiyyəti, hüquq-mühafizə və prokurorluğa, 7 manat 20 qəpiyi əsas bölmələrə aid edilməyən xidmətlərə, 4 manat 70 qəpiyi səhiyyəyə, 2 manat 60 qəpiyi kənd təsərrüfatına, 1 manat 30 qəpiyi mədəniyyət, incəsənət, informasiya, bədən tərbiyəsi, gənclər siyasəti və bu qəbildən olan digər fəaliyyətə, 1 manatı ətraf mühitin mühafizəsinə, 90 qəpiyi mənzil və kommunal təsərrüfatına xərclənib

­Milli Məclisdə büdcə “müzakirələri” başa çatdı.  2024-cü il iyunun 14-də Milli Məclisin növbədənkənar sessiyasının növbəti iclasında “Azərbaycan Respublikasının 2023-cü il dövlət büdcəsinin icrası haqqında” qanun layihəsi[1],  iyunun 25-də  “Azərbaycan Respublikasının 2024-cü il dövlət büdcəsi haqqında” Azərbaycan Respublikasının Qanununda dəyişiklik edilməsi barədə qanun layihəsi[2] qəbul edilib.