Qütbləşmə tam sürətlə davam edərkən

Kürd təmayüllü siyasət öz daxilində tənqidi fikirlər səsləndirməyə başlayıb, son 10 illik prosesləri  saf-çürük edərkən yeni bir siyasi quruma qapı aralanacağı açıq şəkildə müşahidə edilir.

Terror  təşkilatının yaşı 70-i keçmiş başçısından iqtidar bir dəfə də istifadə etmək istədi amma artıq zərrə qədər də faydalı olmayacağını görüncə o dəftəri qatlayıb zibil yeşiyinə atdı.

2011-ci ildən bəri parlamentdə partiya halında təmsil edilən siyasətin həbsxanalardakı təmsilçiləri bir tərəfdə öz səhvlərinə güzgü tutarkən (məsələn, azad edilməsi üçün Aİ-nin hökumətə hər gün təzyiq göstərdiyi Səlahəttin Dəmirtaş) o biri tərəfdə “Türkiyənin partiyası olmaq” hədəfi gündəmə gətirilir, mətbuat vasitəsiylə müzakirəyə çıxarılır (məsələn, Ayhan Bilgen).

İslamçı siyasətin təmsilçilərinin təbiriylə desək, “Marksist kürdlər”lə ittifaqdan ümidini kəsən iqtidar partiyası “Cumhur ittifaqı”nın söykəndiyi bazanı genişləndirmək üçün Meral Akşenerin İYİ Partiyasına həmlə üstünə həmlə etməklə qalmayıb, müxalif ittifaqın sıralarının genişlənməsinə mane olmaq üçün, məsələn, Əhməd  Davudoğlunun Gələcək Partiyasına “göz verib işlq vermir” (müxalif ittifaqla arasını səmimi tutan Əli Babacana hücumların dozası eyni dərəcədə şiddətli deyil).

Hələ ki müxalif ittifaqı parçalamağa müvəffəq olmamaqla yanaşı, yaxın keçmişdə iqtidar partiyasının içindən çıxmış iki yeni siyasi partiyanın o ittifaqa mülayim münasibətini əngəlləyə bilməyən iqtidar bu yöndəki çalışmalarını əsla axsatmır: hədəf siyasi yox, ideoloji olub, islamçı təbəqədən “nə qoparsaq, qazancdır” prinsipi tədavülə daxil edilib. Yəni, siyasi qütbləşmənin iqtidar qanadı təbir caizsə “yolmağa yeni qaz axtararkən” islamçı kütlədən başqa ünvan tapa bilmir.

Gələn xəbərlər Türkiyə islamçılarının siyasi nüvəsi olaraq qalmağa davam edən və dövlət başçısı Ərdoğanın da yetişdiyi “dini düşüncə”nin mərkəzi Səadət Partiyasında qurultay tələblərinin ortaya çıxacağının işarələrini verir.

20 gün əvvəl dövlət başçısı Ərdoğanın 86 yaşlı Oğuzxan Asiltürkün evinə boş yerə getmədiyini yazmışdıq. Səadət Partiyasındakı dindən ən güzəştsiz qanadın üzərində təsir gücü olan Asiltürkün tələbiylə çağırılacaq qurultayda iqtidarın “ittifaq və ya əməkdaşlıq” tələbinə rədd cavabı verən partiyanın hazırkı sədri Təməl Karamollaoğlunun başının üstünə “Domokl qılıncı” kimi asılacaq qurultay tələbinə müsbət cavab verilməməsi durumunda islamçı məcrada yeni bir partiya qurularaq Səadət Partiyası üzv və tərəfdarlarından nə qədər mümkün olsa, oraya cəlb edilməsinə çalışılacaq.

Bu minvalla iqtidar həm “1 səs də qazancdır” formulunu işlətməyə çalışır  həm də SP-ni bacara bildiyi qədər zəiflətmək istəyir. İşin maraqlı tərəfi budur ki, son günlərdə SP lideri Karamollaoğlundan da “ittifaq və əməkdaşlıq” şərtlərinə dair açıqlamalar gəldi ki, iqtidar blokunun SP-nin tələblərini qəbul etməsi  halında güclənəcəyini, yoxsa reytinq itirəcəyini indi müəyyənləşdirmək mümkün  deyil. Çünki hazırda müxalif blokun içində yer alan Səadət Partiyası da ölkənin üsuli-idarə sisteminin dəyişdirilərək “gücləndirilmiş parlamentar sistemə keçilməsinə” təkid edir. İqtidar blokunun təkliflərini qeydsiz-şərtsiz qəbul etməsi durumunda Səadət Partiyasının öz üzvləri və seçici kütləsi arasında çalxantıların yaşana biləcəyini də hesaba qatmaq lazımdır.

Bu proseslərin gedişatını gözləmədən şəxsi proqnozumu ifadə etmə haqqımdan istifadə edərək Səadət Partiyasının bir müddət sonra başında AKP-nin durduğu iqtidar blokuyla ittifaqa girəcəyini demək istəyirəm. Bunun əsas səbəbi ölkədəki qütbləşmənin “dünyəvilər- islamçılar” qarşıdurması üzərində dərinləşməsi, dövlət başçısı Ərdoğanın özünü təkcə Türkiyə sünnilərinin yox, dünya sünnilərinin lideri kimi görməsi, bu təməldə hərəkət edən Dini İşlər İdarəsinin səlahiyyətlərinin hər gün genişləndirilərək siyasətə aktiv şəkildə müdaxilə etməsi və digər faktorlar olub, SP-nin bu ittifaqda yaxasını kənara çəkməsi halında AKP-dən onun alnına vurulacaq damğa  latın və ərəb əlifbalarında “mübarizəyə xəyanət” olacaq.

hazırda əlində böyük sərmayə ilə yanaşı saysız media qurumu olan AKP-nin bu ağır ithamından SP-ni xilas etmək çox-çox uzun vaxt alacaq. Nəticədə o cinahın gözündə Oğuzxan Asiltürk “cənnətə getməyi təminata almış bir islam sərvəri” kimi cənnətin, Təməl Karamollaoğlu isə “Kamalizmin çuxuruna  yuvarlanmış bir kafir” olaraq cəhənnəmin biletini cibinə qoyacaq.

Təbii ki, bu gün AKP-nin sıralarında qeyri-məhdud sərvətə sahib olub mövcud vəziyyətin qeydsiz-şərtsiz davam etməsini istəyənlərin baxımından...

Bu həsb-hal içində İlqar Məmmədovun 234 manatı insanın gözünü sevincdən  necə yaşartmasın?