3 ton heroinlə bağlı Narkomanlığa Qarşı Mübarizə üzrə Dövlət Komissiyasının qapalı iclası keçirilib

Avqustun 14-də Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının aidiyyəti orqanların məsul şəxslərinin iştirakı ilə qapalı iclası keçirilib.

AzərTAc-ın  məlumatına  görə iclasda cari il iyulun 11-də Gürcüstan Daxili İşlər Nazirliyinin ölkədə külli miqdarda (2800 litrə yaxın yuyucu maddədə həll edilmiş 588 kiloqram 885 qram heroin, 11 kiloqram 759 qram morfin və 2 kiloqram 201 qram kodein) narkotik maddənin saxlanılması və Azərbaycan Respublikası ərazisindən tranzit olaraq keçməsi barədə ilkin məlumat üzrə aidiyyəti orqanlar tərəfindən aparılan araşdırmanın nəticələri müzakirə edilib.

İclasda araşdırmanın davam etdirilməsi, görülən işlər barədə Dövlət Komissiyasının mütəmadi olaraq məlumatlandırılması barədə müvafiq tapşırıqlar verilib. Hazırda məlum olub ki, bu vaxtadək  araşdırma gedib. Narkotiki kimin gətirməsi  barədə açıqlama verilmir.

Bir  çox jurnalistlər güc strukturlarına  bir neçə dəfə bu məsələ ilə bağlı  müraciət etsələr də, araşdırmanın getmədiyini  deyiblər.

Qeyd edilib ki, bu məsələ Azərbaycan Respublikası Prezidentinin gündəlik nəzarətindədir.

Xatırladaq ki,  iyulun 11-də Gürcüstan DİN mətbuat mərkəzi  məlumat yayıb ki, 3 ton heroin  Gürcüstan ərazisindən Azərbaycan  tranzit olaraq keçib. Hökumətyönlü  mətbuat  yazıb ki,narkotik  Gürcüstana Ermənistandan daxil olub.-02d-