“Hörmətli prezidentimiz, artıq dərəcədə xahiş edirik ki, Azərbaycan Beynəlxalq Universitetinin (ABU) tələbələrinin taleyinə biganə qalmayasınız, ədalətli, amnistiya xarakterli humanist qərar verilməsi, ölkənin təhsil müəssisələrinə köçürülməyimiz üçün Təhsil Nazirliyinə göstəriş verəsiniz”. Bu barədə ABU-nun Dağıstan filialında təhsil almış, lakin diplomları indiyədək verilməmiş tələbələrin prezident İlham Əliyevə bu gün ünvanladığı müraciətdə deyilir.
ABU-nun Dağıstan filialının bir qrup tələbəsi və tələbələrin valideynləri RATİ-nin Mətbuat Mərkəzində mətbuat konfransı keçirib.
Valideynlər bildiriblər ki, ABU-nun Dağıstan filialında oxumuş 4700 tələbə indiyədək diplom ala bilmir və ya ölkənin digər universitetlərinə köçürülmür. 2010-cu ildə ABU-nun fəaliyyəti dayandırılandan sonra bu universitetin Moskva filialında oxuyan tələbələr Azərbaycan universitetlərinə köçürülüb. Ancaq Dağıstan filialında oxuyan tələbələrə indiyədək nə diplom verilir, nə də onlar Azərbaycanın universitetlərinə köçürülür.
Valideynlər və tələbələr ölkə prezidentinə, onun xanımına, dövlət və hökumət qurumlarına, ombudsmana, prokurorluq orqanlarına çoxsaylı müraciətlər edib, lakin indiyədək problem həllini tapmayıb. “Təhsil naziri Mikayıl Cabbarov üç ay öncə söz verdi ki, problemi həll edəcək. Lakin indiyədək nazir Cabbarov da bu tələbələrin köçürülməsi və ya diplom verilməsi ilə bağlı qərar qəbul etməyib. Hazırda 4 700 vətəndaş gələcək taleyini müəyyən edə bilmir, onlar işləyir, ailə saxlayır. Biz prezidentimizdən xahiş edirik ki, bu gənclərin hüquqlarının bərpa edilməsinə kömək etsin. Biz hamımız onun seçiciləriyik”, deyə valideyn Darican Mahmudova qeyd edib.
Mətbuat konfransında çıxış edən tələbələr tələbə biletlərini, qiymət kitabçalarını nümayiş etdirib, dərslərdə fasiləsiz iştirak etdiklərini, təcrübə keçdiklərini bildirib. “Kimlərinsə qanunsuz hərəkətləri biz tələbələrin taleyini sual altında qoymamalıdır. Biz universiteti bitirdikdən sonra hərbi xidmətdə də olmuşuq. Ölkə başçısından, təhsil nazirindən bizim taleyimizə biganə qalmamağı xahiş edirik. Bizimlə eyni statusda olan Moskva filialının tələbələrinin problemi artıq həllini tapıb”, deyə filialın məzunu Elçin Məmmədov qeyd edib.
Xatırladaq ki, ABU-nun Dağıstan, Moskva və Dubay filialları fəaliyyət göstərib. 2010-cu ildə universitetin fəaliyyəti dayandırılıb. ABU-nun rektoru Elşad Abdullayev hazırda Fransada sığınacaq alıb. O, qardaşı Mahir Abdullayevin oğurlanması ilə bağlı hökumətin yüksək vəzifəli şəxslərinin ünvanına ittihamlar irəli sürüb. Prokurorluq orqanları Elşad Abdullayevə qarşı cinayət işi qaldırıb, barəsində axtarış elan edib. Universitetin fəaliyyəti dayandırıldıqdan sonra bu təhsil müəssisəsinin minlərlə tələbəsi problemlərlə üzləşib. Artıq 4 il ötməsinə baxmayaraq, insanların problemləri hələ də həllini tapmayıb. -03C-
Cəmiyyət
-
Dekabrın 22-də Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağıntısız keçəcəyi gözlənilir. Lakin gecə və səhər bəzi yerlərdə çiskin olacağı ehtimalı var. Mülayim cənub-qərb küləyi əsəcək.
-
Çox vaxt "Qafqazın Dubayı" adlandırılan Bakı getdikcə sakinlərin mənzil hüquqlarının sistematik şəkildə pozulması ilə tanınmağa başlayır. Şəhərin yenilənməsi və yeni eleqant binaların inşası zamanı Azərbaycanın paytaxtında minlərlə ailə qanunsuz olaraq öz evlərindən məhrum edilib. Çoxları müqavimətin faydasız olduğunu bilərək, öz qiymətli əmlaklarına görə qeyri-adekvat pul kompensasiyasına razılaşır. Mənzil Məcəlləsinə inanan azlıq isə tikinti şirkətlərindən ədalətli təzminat tələb edir, ancaq çox vaxt hər şeyi itirir - həm evini, həm də təzminatın istənilən formasını.
-
Düşərgədə iştirak edən məktəblilər ölkəmizi üç nüfuzlu beynəlxalq olimpiadada təmsil edəcək Ölkəmizin beynəlxalq fənn olimpiadalarında təmsil etməyə hazırlaşan şagirdlərin hazırlıq prosesi müvəffəqiyyətlə davam edir. Azercell, Elm və Təhsil Nazirliyi və Təhsil İnstitutunun birgə əməkdaşlığı çərçivəsində Bakı Ali Neft Məktəbində bu məktəblilər üçün növbəti “İnformatika Düşərgəsi” təşkil olunub.
-
Ötən gecə Azərbaycan-Ermənistan sərhədində 4.8, 3 və 3.8 maqnitudalı zəlzələlər baş verib, Azərbaycan Milli Elmlər Akademiyası Respublika Seysmoloji Xidmət Mərkəzi bildirib.
Rəy yaz