Adam oğurluğu ilə məşğul olan Pakistan vətəndaşı saxlanılıb

Azərbaycan ərazisində adam oğurluğu ilə məşğul olan Pakistan vətəndaşları saxlanılıb.

Azərbaycan Dövlət Təhlükəsizliyi Xidmətinin (DTX) məlumatında deyilir ki, Pakistan vətəndaşı Ullah Naeem Xan Navvab digərləri ilə cinayət əlaqəsinə girib qabaqcadan sövdələşməklə, həmin ölkənin vətəndaşı Şeraz Muhammad Afzal Muhammadı Kanada dövlətinə getməsi üçün vizasının təsdiq edilməsi adı altında aldadaraq Azərbaycana gəlməsinə nail olub.

"Mütəşəkkil cinayətkar dəstə üzvlərinin əvvəlcədən əldə etdikləri razılıq əsasında kirayəyə götürdükləri Qəbələ rayonunun Vəndam qəsəbəsində (Bakıdan 216 kilometr) yerləşən evə aparıb, qollarını və ayaqlarını bağlayaraq orada saxlayıb və azad edilməsi müqabilində onun Pakistanda olan yaxın qohumlarından külli miqdarda pul vəsaiti tələb edib. Dövlət Təhlükəsizliyi Xidmətinin əməkdaşları cinayət əməllərini törədən şəxsləri Qəbələ rayonunun Vəndam qəsəbəsindəki evdə cinayət başında saxlayıb, Şeraz Muhammad Afzal Muhammad isə azad edib", deyə DTX bildirir.

Həbs olunan Ullah Naeem Xan Navvab və digərləri barəsində Azərbaycan Cinayət Məcəlləsinin 144.2.3 və 144.2.6-cı (qabaqcadan əlbir olan bir qrup şəxs halında tamah məqsədi ilə adam oğurluğu) maddələri ilə cinayət işi başlanılıb.