AFFA Türkiyə Superkuboku uğrunda matçın keçirilməsindən imtina edib

Azərbaycan Futbol Federasiyaları Assosiasiyası (AFFA)  Türkiyə Futbol Federasiyasının Bakıda ölkənin Superkubok yarışını keçirməsindən imtina edib. Türkiyə KİV-nin yaydığı bu məlumatı AFFA-nın baş katibi Elxan Məmmədov Turan-a təsdiqləyib. Onun sözlərinə görə, imtinaya səbəb vaxtın olmaması və AFFA-nın özünün çoxlu sayda tədbirlərinin olmasıdır. 

Türkiyə Federasiyası çempion “Qalatasaray” və kubok sahibi “Fənərbahçe” arasınsa yarışın avqustun 11-də Bakıda keçirilməsini təklif etmişdi. Son illər Türkiyə Federasiyası Superkubok uğrunda matçları öz ölkəsindən kənarda – böyük türk diasporunun olduğu Almaniya, Avstriya kimi yerlərdə keçirir. Azərbaycan da Türkiyə futbolunun çoxsaylı pərəstişkarlarının olması nəzərə alınaraq seçilmişdi.

İdman şərhçilərinin fikrincə, AFFA-nın arqumentləri o qədər inandırıcı deyil, çünki matça hələ iki ay var. Çox güman ki, bu, “başağrısı”ndan qaçmaq istəyindən irəli gəlib.

“Qalatasaray” və “Fənərbahçe” arasında matçlar həmişə kompromissizliyi ilə fərqlənir. Həm meydançada, həm də kənarda hər iki komandanın azarkeşləri arasında qarşıdurma yaranır. Son vaxtlar azərbaycanlı azarkeşlər də matçlardan sonra iğtişaşlar törədirlər. Bu cür iğtişaşlar “Neftçi” və “Xəzər Lənkəran” klubları arasında yarışdan sonra baş verib. Prokurorluq fakt üzrə cinayət işi qaldırıb.

Çox güman ki, Bakıda matçın keçirilməsindən imtina olunmasına Türkiyədəki son hadisələr də təsir göstərib.—06D-