Ağacların kəsilməsinə etiraz aksiyası (Video)

Bu gün Fətəli xan Xoyski küçəsində yerləşən evlərin sakinləri ağacların kəsilməsinə etiraz aksiyası keçiriblər. Onlar yolu bağlayıblar, bu da nəqliyyatın dayanmasına səbəb olub.

Sosial şəbəkə istifadəçilərinin verdiyi məlumata görə, hadisə yerinə polis qüvvələri gəlib, onlar vətəndaşları sıxışdırıblar. Danışıqlardan sonra sakinlər yolu boşaldıblar. Amma onlar ağacların kəsilməsinə son qoyulmasını tələb edirlər.

İşləri həyata keçirən şirkətin nümayəndələri bildiriblər ki, ağacların kəsilməsi qanuni əsaslarla həyata keçirilir və hətta məhkəmə qərarları var.

Sakinlərin tələbi ilə aksiyanın keçirildiyi yerə gələn Ekologiya Nazirliyinin Raqub Mirzəyev bildirib ki, nazirlik araşdırma aparır.

“İlkin məlumata görə, orada 12, 14, 16 sm diametri olan ağaclar, meyvə ağacları, şitillər kökündən sökülüb. Hələlik dəqiq rəqəmlər yoxdur. Amma istənilən halda hər şey sənədləşdiriləcək, təqsirkarların müəyyən edilməsi üçün polisə müraciət olunacaq.

İnzibati Xətalar Məcəlləsinin 253-cü maddəsi ilə araşdırma aparılacaq, təqsirkarlar müəyyən olunacaq, onlar barəsində qanunla müəyyən edilmiş tədbirlər görüləcək”, deyə “Azadlıq radiosu” Mirzəyevdən sitat gətirir. -06D-