Ağdaşda İqbal Ağazadənin xeyrinə imza toplanmasına problemlər yaradılır

 90 saylı Ağdaş seçki dairəsindən parlamentə təkrar seçkilərdə deputatlığa namizəd Ümid Partiyasının sədri İqbal Ağazadənin komandasının üzvləri şənbə günü seçicilərin imza toplanması zamanı problemlərlə üzləşiblər.

Partiya sədrinin müavini Elman Rüstəmov Turan-a bildirib ki, bir qrup naməlum şəxs imza toplayanları təqib edərək İ.Ağazadənin xeyrinə imza toplanmasına son qoyulmasını tələb edib. Onlar təkcə İ.Ağazadənin nümayəndələrinə  hədə-qorxu gəlməyiblər, hətta seçiciləri də qorxudublar.

“Bizə dedilər ki, burada imza toplamayın, bizim öz namizədimiz var”, - E.Abbasov qeyd edib.

Onun fikrincə, İ.Ağazadənin nümayəndələrinə təzyiqlərin arxasında rayon hakimiyyəti durur.

O deyib ki, bu dairədə Ağdaş Rayon İcra Hakimiyyəti başçısının birinci müavini  və hakim Yeni Azərbaycan Partiyası yerli təşkilatının sədri Cavid Osmanov  namizədliyini irəli sürüb.

E.Abbasov bildirib ki, Ümid Partiyası baş verənlərlə bağlı DİN-in “102 xidməti”nə və MSK-ya məlumat versə də  heç bir tədbir görülməyib.

“Ümid edirik ki, bu qanunsuz hərəkətlər barədə bəyan etdikdən sonra dövlət orqanları lazımi tədbirlər görəcək və biz sakit məcrada imza toplanışını davam etdirəcəyik”, - E.Abbasov vurğulayıb.

Qeyd edək ki, İ.Ağazadə 2015-ci il noyabrın 1-də 35 saylı üçüncü Xətai dairəsindən namizədliyini irəli sürüb. O, səsvermənin nəticələrinə görə özünün qələbəsini təsdiqləyən protokolları  təqdim etsə də başqa namizəd deputat elan edilib.—06B--