Vəkil Vüqar Xasayev: «Qanunsuzluqlar dayandırılıb»

Ləğv edilmiş Naxçıvan Milli Təhlükəsizlik Nazirliyinin keçmiş rəhbəri Vəli Ələsgərova qarşı işgəncələr, Dövlət Təhlükəsizlik Xidmətinə qanunsuz aparmalar hamısı dayandırılıb”. Bunu Turan-a V.Ələsgərovun vəkili Vüqar Xasayev bildirib.

Onun szölərinə görə, aprelin sonlarında vəkillərin keçirdiyi mətbuat konfransı vasitəsilə məsələ ictimailəşdirildikdən sonra bütün qanunsuzluqlara son qoyulub. V.Xasayev V.Ələsgərovla İnternet vasitəsilə əlaqə saxladığını deyib: “İnternet vasitəsilə hər gün əlaqə saxlayırıq, əgər istintaq hərəkətləri olacaqsa o zaman müdafiə etdiyim şəxslə canlı təmasa ehtiyac olacaq. Hələlik elə bir ehtiyac yaranmayıb”.

V.Xasayev ölkə prokurorluğuna müraciət etdiklərini də söyləyib. “Bizim müraciətimizdə bu cinayət işinin Naxçıvan prokurorluğundan alınaraq Baş Prokurorluğun bölmələrindən birinə tapşırılması xahiş olunur və artıq müraciətimiz Baş Prokurorluğa çatıb və Baş Prokurorluğun reaksiyasını gözləyirik. Mayın ilk günlərində müraciət Baş Prokurorluğa göndərilib”.

V.Ələsgərov 2015-ci il dekabrın 18-də vəzifədən azad edilib. 2016-cı il martın 7-də barəsində həbs qətimkan tədbiri seçilib. Martın 29-da həbs qətimkan tədbiri ev dustaqlığı ilə azad edilib. Ona qarşı Cinayət Məcəlləsinin səlahiyyət həddini aşma, qulluq mövqeyindən sui-istifadə, özgənin əmlakını mənimsəmə kimi ittihamlar irəli sürülüb. V.Ələsgərov özünü təqsirli saymır, ittihamları rədd edir.

Vəkilləri bu il aprelin sonunda keçirdikləri mətbuat konfransında V.Ələsgərovun işgəncələrə, fiziki zorakılıqlara, alçaltmalara məruz qalması haqda mətbuata açıqlamalar vermişdilər.-05B-