AMAY Şirkətlər Qrupunun prezidenti Abdulla Abdullayevin məhkəməsi başlayır

AMAY Şirkətlər Qrupunun prezidenti Abdulla Abdullayevin cinayət işi üzrə hazırlıq iclası yanvarın 29-na təyin edilib. Bu haqda Turan-a A.Abdullayevin vəkili  Osman Kazımov bildirib.

O qeyd edib ki, A.Abdullayev Cinayət Məcəlləsinin 178-3-2-ci (külli miqdarda ziyan vurmaq) 179.3.2-ci (külli miqdarda mənimsəmə və ya israfetmə) və 308-ci (vəzifə səlahiyyətlərindən sui-istifadə) maddələrilə təqsirli bilinir.   

A.Abdullayev 2014-cü ilin aprelində həbsə alınıb. Cinayət işi artıq Bakı Ağır Cinayətlər Məhkəməsinə göndərilib.

A.Abdullayev mövcud rejimə sadiq olan iş adamlarından biridir. Belə ki, mövcud iqtidarın əsasını qoyan mərhum dövlət başçısı Heydər Əliyev Moskvada vəzifəsindən azad olunduqdan sonra A.Abdullayev onun yanında olub. Bütün ağır vaxtlarda H.Əliyevə sədaqətini əməlilə təsdiq edib.

AMAY şirkətinə hücumlar isə 2004-cü ilin mayından başlanıb. Metronun “Gənclik” stansiyası yaxınlığında şirkətə məxsus Ticarət Mərkəzinin 2004-cü ilin yayında sökülməsi qərarı veriləndə belə A.Abdullayev bu qərara “dövlət maraqları tələb edirsə deməli, sökülməlidir” mövqeyini nümayiş etdirib. Hətta bir çox ticarətçilər bu qərara etiraz edəndə onların önünə çıxan A.Abdullayev “dövlət marağından yüksək heç nə ola bilməz” mövqeyini ortaya qoyub.-05B/D-