Mətbuat-Monitorinq 28.01.15

Rəsmi qəzetlər dövlət başçısı İlham Əliyevin regionların 2014-18-ci illərdə sosial-iqtisadi inkişafı üzrə Dövlət Proqramının icrasının birinci ilinin yekunlarına dair konfransdakı çıxışını ilk səhifədə yerləşdiriblər.

Bundan əlavə, bu qəzetlərdə Quba, Göyçay, Ucar rayonları icra başçılarının yerlərinin dəyişdirilməsi haqda sərəncamların mətnlərini dərc ediblər.

“Azadlıq” qəzeti PA ictimai-siyasi şöbəsinin müdiri Əli Həsənovun ABŞ-dakı yəhudi lobbisinin Azərbaycana kömək etməsi bəyanatını önə çəkərək bunu “İranı qıcıqlandıracaq açıqlama” adlandırır.

Hüquq müdafiəçisi Günay İsmayılova naməlum şəxsin basqınına məruz qalması haqda polis orqanlarına müraciət etsə də şikayəti qəbul edilməyib.

Şərlənərək məhkum edilən bloger Əbdül Əbilovun anası həbsxanada oğluna qarşı amansız münasibətə “oğlum tanınmaz hala düşüb” bəyanatını səsləndirib.

Azərbaycan QHT-ləri ilə həmrəylik nümayiş etdirən Norveçin 25 QHT-si “Qarabağa azadlıq” bəyanatını imzalayıblar.

Qəzet qeyd edir ki, Heritage Fondu və “Wall Street Jorunal” iqtisadi azadlıq səviyyəsinə görə 185 ölkə arasında Azərbaycanı 85-ci yerə, “qismən azad ölkə” qrupuna aid edib.

BP-Azərbaycan ixtisarlara başlayıb, artıq 255 nəfər işdən azad edilib, daha 145 nəfərin azad ediləcəyi bildirilir.

Manatın məzənnəsinin sabit saxlanması üçün hər ay 1,5 milyard dollar xərcləndiyini deyən ekspertlərə görə,  ölkənin valyuta ehtiyatı bu təzyiqə çox dözməyəcək.

Qəzetin yazdığına görə ,“Xəzərdənizgəmiçilik” müəssisəsinin keçmiş rəhbəri Aydın Bəşirov rəsmi Bakının tələb etdiyi 10 yük gəmisindən 3-nü qaytarıb.

“Ekspress”  PA ictimai-siyasi şöbəsinin müdiri Əli Həsənovun “Bakı üçün İsrailin vacib ölkə olması” bəyanatını ilk səhifəyə çıxarıb. 

Müdafiə Nazirliyi rəsmi Yerevanın Azərbaycana hədə-qorxularına “fikri Ermənistandakı daxili xaosdan yayındırmaq” bəyanatı ilə cavab verib.

“Exo”  ekspertlərə isnadən rus rublunun ucuzlaşmasından Azərbaycanın digər ölkələrlə müqayisədə güclü ziyan çəkməyəcəyi, amma az da olsa ziyan olacağını ön plana çıxarıb 

“Bizim yol”  Nəqliyyat Nazirliyinin büdcədəki payının 2 dəfə azalmasını, bütün nazirliklərə may-iyun aylarına qədər əməkdaşları 21% azaltmaq tapşırığı verilməsini ilk səhifəyə çıxarıb.

Qəzet araşıdırmaya isnadən dünyanın imtina etdiyi dərmanların, faydasız və zərərli preparatların ölkə apteklərini “işğal” etməsini nəzərə çatdırır.   

“Yeni Müsavat”  ermənilərin Gədəbəy cəbhəsinə hücumunu ilk səhifəyə çəkərək bunu “düşmənin təxribat taktikasını dəyişdirməsi” adlandırır.

Məhbus Lamiyə Quliyevanın həbsdə ana olması ilə bağlı həbsxanalarda yoxlamalara başlanması haqda dövlət başçısının gözlənilən qərarını qəzet Penitensiar Xidmət rəhbəri Mədət Quliyevin “hədəf”ə gətirilməsi hesab edir.

Qəzet deputatlar Səməd Seyidov və Asim Mollazadənin ABŞ səfərini “rəsmi Bakının Vaşinqtonla dil tapmaq cəhdi” kimi dəyərləndirir.

Qəzet ekspertlərə isnadən neftin qiymətinin ucuzlaşmasını ölkədə işsizliyin artması, “paket sistemi”nin ləğvi, ixtisarların başlaması kimi dəyərləndirir.