ANS-ə növbəti zərbə - daha bir veriliş bağlanıb

Milli Teleradio Şurası ANS telekanalında daha bir verilişin efirə çıxmasını qadağan edib.

Qadağa qanunvericiliyin daim və kobud şəkildə pozulması ilə bağlıdır. Bu dəfə “Hesabat” həftəlik analitik proqramının 2015-ci il dekabrın 27-də və 2016-cı il yanvarın 17-də buraxılışlarında pozuntular aşkar edilib.

MTRŞ-nin məlumatında deyilir ki, yanvarın 22-də keçirilən iclasda sözügedən buraxılışlarda qərəzsizlik, obyektivlik və dəqiqlik prinsiplərinin pozulduğu qeyd edilib.

Bu zaman işgüzar nüfusa xələl gətirmə, hadisələrin birtərəfli şərh edilməsi və qiymətləndirilməsi baş verib.

“Yuxarıda deyilənləri nəzərə alaraq, yanvarın 24-dən etibarən 1 ay ərzində “Hesabat” proqramının efirə çıxması dayandırılıb”, deyə məlumatda bildirilir.

Xatırladaq ki, bundan əvvəl MTRŞ ANS-i iki dəfə ümumilikdə 300 min manatdan çox cərimə edib. Bu cərimələr telekanalın reklam haqqında qanunu pozması ilə əlaqədar kəsilib.

ANS MTRŞ-nin qərarından məhkəməyə şikayət edib, amma uduzub.

Son həftələrdə ANS heyətinin bir hissəsinin işdən çıxarılması haqqında qeyri-rəsmi məlumatlar daxil olur, amma telekanal özü baş verənləri heç cür şərh etmir.

Maraqlıdır ki, kanal rəhbərliyinin ölkənin ali rəhbərliyinin dəstəyinə nail olmaq cəhdləri də nəticə vermir. Belə ki, növbəti verilişin bağlanması haqqında bugünki qərar ANS-in Mehriban Əliyevanı “İlin adamı” elan etmək qərarı ilə eyni vaxta təsadüf edib. -06D-