A.Paşazadə: Mən özüm də Hacı Şahinin moizələrinə qulaq asıram

Ramazan ayının başlanması ilə bağlı cümə axşamı Qafqaz Müsəlmanları İdarəsində (QMİ) keçirilən tədbirdə Şeyxülislam Allahşükür Paşazadə bəzi axundları tənqidə məruz qoyub.

O, keçən il bəzi rayonlarda Ramazan ayı ilə bağlı fətvanın verilməsində axundları zəiflik göstərməkdə ittiham edib. QMİ sədri axundlara irad bildirmək istəmədiyini söyləyib və belə iradların axundların işdən azad olunmaqla nəticələnəcəyi xəbərdarlığı edib.

A.Paşazadənin sözlərinə görə, keçən il fətva verilib, amma bəzi axundlar bunu camaata çatdırmayıb. Onun fikrincə, fətva təkcə məscidə gələnlərə yox, bütün vətəndaşlara çatdırılmalıdır. QMİ sədri çox axundların moizələrinin ötən ilkindən heç nə ilə fərqlənmədiyini deyərək, bu axundları öz üzərlərində işləməməkdə ittiham edib. “Mən Hacı Şahinin moizələrinə qulaq asıram, çünki orada həqiqət var və niyə də qulaq asmayım?”, - deyə Şeyxülislam vurğulayıb.

A.Paşazadə Zaqatalanın bəzi məscidlərini orucluq ayı ilə bağlı QMİ-nin təqvimlərinə tabe olmamaqda ittiham edib, Azərbaycanda yaşayan insanların bu ölkənin qərarlarına tabe olmalı olduğunu xatırladıb. O,qanuna tabe olmayan icmaların rəsmi qeydiyyatlarının ləğv olunacağı xəbəırdarlığı edib.  

A.Paşazadə məscidlərdə məzhəbindən asılı olmadan hamıya əhya saxlamaq, ibadət etmək rahatlığı yaradılması zərurətini də irəli sürüb. “Biz dini etiqadları qoruyub saxlamalıyıq və istəyirik ki, bütün məscidlərdə şiə din xadimi olduğu kimi, sünni din xadimləri də olsun və bu mənəviyyatı yaşatmalıyıq”, -deyə A.Paşazadə qeyd edib. -05B-