Apellyasiya Məhkəməsi Murad Ədilov barəsində hökmü qüvvədə saxlayıb

Şirvan Apellyasiya Məhkəməsi bu gün Xalq Cəbhəsi Partiyasının həbsdə olan fəalı Murad Ədilovun şikayətini təmin etməyib.

Vəkil Yalçın İmanovun Turan-a verdiyi məlumata görə, bir müddət əvvəl Apellyasiya Məhkəməsi qismi məhkəmə istintaqı aparmaqdan imtina edib. Vəkil və Ədilov özü prosesdə çıxış edərək, ittihamın əsassız olduğunu və onun təqsirinin sübutunun olmadığını bildiriblər.

Müdafiə tərəfi Ali Məhkəməyə kassasiya şikayəti vermək niyyətindədir.

* Murad Ədilov bu ilin mayında qanunsuz narkotik dövriyyəsi ittihamı ilə 6 il müddətinə azadlıqdan məhrum edilib. O, məcburi mühacirətdə olan müxalif jurnalist, “Azərbaycan saatı” televerilişinin aparıcısı Natiq Ədilovun qardaşıdır.

** Avropa İnsan Hüquqları Məhkəməsi (AİHM) 2015-ci il sentyabrın əvvəllərində Murad Ədilovun işgəncə haqqında şikayətini icraata qəbul edib. Vəkil Yalçın İmanovun verdiyi məlumata görə, şikayətdə Avropa İnsan Hüquqları və Azadlıqları Konvensiyasının 3-cü maddəsinin (işgəncələrin qadağan edilməsi) pozulduğu bildirilir.

2014-cü il avqustun 11-də saxlanıldıqdan sonra Ədilov Sabirabad rayon polis bölməsində etirafedici ifadələr alınması məqsədilə bir saat döyülüb. Müdafiə tərəfin şikayətlərinə baxmayaraq, prokurorluq bu fakt üzrə cinayət işi açmaqdan imtina edib, Azərbaycan məhkəmələri isə prokurorluğun qərarından şikayətləri təmin etməyiblər.

Bununla əlaqədar müdafiə tərəfi AİHM-ə müraciət edib, məhkəmə Ədilovun 5-ci maddə (azadlıq və şəxsi toxunulmazlıq hüququ) üzrə hüquqlarının pozulması haqqında ərizəsini qəbul edib. -06D-