Apellyasiya Məhkəməsi Natiq İsbatovu həbsdə saxladı

Bakı/29.04.20/Turan: Dünən Sumqayıt Apellyasiya Məhkəməsi Vidadi Cəfərovun sədrliyi ilə reportyor Natiq İsbatovun inzibati həbsindən verdiyi şikayəti təmin etməyib. Karantin rejimi əsas gətirilərək, o özü məhkəməyə gətirilməyib, bu barədə Turan-a vəkil Zibeydə Sadıqova bildirib.

Onun sözlərinə görə, İsbatov İnzibati Xətalar Məcəlləsinin 211 (karantin rejimini pozma) və 535.1-ci (polisə tabe olmama) maddələri ilə özünü təqsirli bilmir.

Reportyor iddia edir ki, aprelin 9-da Xırdalanda Əhalinin Məşğulluq Mərkəzi qarşısında vətəndaşların aksiyasını çəkərkən saxlanılıb. O, Abşeron rayon polis idarəsinə aparılıb, növbəti gün isə 30 gün müddətinə həbs edilib.

İsbatov aksiyada reportyor kimi iştirak edib, üzərində xidməti vəsiqəsi olub və mətbuat nümayəndəsi jileti geyinib, buna görə karantin rejimini pozması haqqında iddianı əsassız hesab edir, deyə vəkil qeyd edib.

Polisə tabe olmama ittihamına gəlincə, inzibati xətalar haqqında protokolda yazılıb ki, polis əməkdaşı ona sosial məsafəyə riayət etməyi təklif edib, o isə tabe olmayıb.

"İsbatovun sözlərinə görə, belə bir xəbərdarlıq olmayıb. Olsaydı, əlbəttə ki, yerinə yetirərdi", deyə vəkil bildirib. Onun sözlərinə görə, aksiyanı digər mətbuat nümayəndələri işıqlandırıb.

İsbatov 7GUN saytı ilə əməkdaşlıq edir. Human Rights Watch  və "Sərhədsiz Reportyorlar" onun həbsini pisləyib. -06D-