Apellyasiya Məhkəməsi Qiyas İbrahimovun şikayətinə baxır

  Noyabrın 10-da Bakı Apellyasiya Məhkəməsində NİDA Vətəndaş Hərəkatının fəalı Qiyas İbrahimovun Bakı Ağır Cinayətlər Məhkəməsinin hökmündən verdiyi şikayət üzrə ilkin baxış iclası keçirilib.

Turan-ın müxbirinin verdiyi məlumata görə, bugünki prosesdə gənc fəalın vəkili Elçin Sadıoqov Qiyas İbrahimovla bağlı prosesin qismən istintaqla aparılması, gənc fəala bəraət verilməsi, iş üzrə əlavə şahidlərin çağırılması, narkotik maddə üzrə ekspertizanın təyin olunması barədə vəsatət verib.

Məhkəmə vəsatətləri təmin etməyib. İclasın baxış iclası dekabrın 26-na təyin edilib.

Apellyasiya şikayətində Qiyas İbrahimova bəraət verilməsi xahiş olunub.

NİDA Vətəndaş Hərəkatının üzvləri Qiyas İbrahimov və Bayram Məmmədov bu il mayın 10-u gecə saatlarında sabiq prezident Heydər Əliyevin abidəsinə yazılmış şüardan sonra saxlanılıblar. Hər iki gənc qanunsuz narkotik dövriyyəsində ittiham olunur.

Dövlət ittihamçısının 9 il həbs istəməsinə baxmayaraq, bu il oktyabrın 25-də Bakı Ağır Cinayətlər Məhkəməsinin hakimi Ənvər Seyidov Qiyas İbrahimovun 10 il azadlıqdan məhrum edilməsi barədə hökm çıxarıb.

Amnesty International Qiyas İbrahimovu və Bayram Məmmədovu "vicdan məhbus"u elan edib. Qurum hesab edir ki, gənclərə qarşı narkotik ittihamı saxtadır.

“Gəncləri siyasi fəaliyyətinə görə cəzalandırmaq yeganə məqsəd olub”, Amnesty İnternational belə hesab edir. -03/16D-