Araşdırmaçı jurnalist Cəsur Sümərənli ona təzyiqlərin olduğunu bildirib

Jurnalistlərin Hərbi Araşdırmalar Mərkəzinin rəhbəri, “Respublika alternativi” vətəndaş hərəkatının (REAL) üzvü Cəsur Sümərənli öz ünvanına hədələrin olduğunu bildirib. Onun sözlərinə görə, bu, KİV-də Azərbaycan-Rusiya hərbi əməkdaşlığı barədə çıxışından sonra baş verib.

O, öz bəyanatında bildirib ki, hansısa adamlar onunla əlaqə yaradaraq ölkənin ali hakimiyyətinin adından danışıblar. Ona bildiriblər  ki, Sümərənlinin fikirləri ilə bağlı RF hərbi dairələrindən rəsmi Bakının ünvanına etiraz daxil olub. 

“Mənə dedilər ki, öz məqaləm ilə gələcək ikitərəfli hərbi-texniki əməkdaşlığı təhlükə altına alıram və ikitərəfli münasibətlərin pozulması ilə bağlı təhlükə yaradıram”, - Sümərənli  bildirib.

Bundan əvvəl Putunun Bakı səfərini şərh edən jurnalist bildirib ki, Bakı danışıqlarında hərbi-texnik əməkdaşlığın genişləndirilməsi və hərbi kadrların hazırlığı üzrə sazişlər əldə olunub ki, bu da Azərbaycan Silahlı  Qüvvələrinin NATO standartları üzrə inkişafına ziddir.

Sümərənli deyib ki, bu cür yazıların dərcinə son qoyması üçün ona pul təklif olunub, lakin o razılaşmadıqda xoşagəlməz hadisələrin ola biləcəyi ilə hədələyiblər. 

Sümərənli qərb mənbələrindən məlumat almaqda ittiham olunub və guya bu məlumatlar ona bir xanım jurnalist tərəfindən ötürülüb. 

Sümərənli həqiqətən kafedə xanım jurnalistlə görüşüb, lakin onun xahişi ilə Militarization in Black Sea Region layihəsi çərçivəsində araşdırma üçün Qara dəniz regionunda silahlanma mövzusunu şərh edib.

O qeyd edib ki, söhbət zamanı kənardan iki şəxs tərəfindən izləndiyini hiss edib. 

Jurnalist bildirib ki, ona və ya ailəsinə qarşı mümkün hərəkətlərə görə məsuliyyəti Azərbaycan hakimiyyəti daşıyacaq. O, vətəndaş cəmiyyətini və medianı ona dəstək olmağa çağırıb.—06D-