Meriya avtomobillərin saxlanmasının qadağan edildiyi küçələrin siyahısını açıqlayıb

Bakı şəhərinin mərkəzi hissəsində yaranan nəqliyyat sıxlığı probleminin aradan qaldırılması məqsədilə paytaxtın mərkəzi hissəsində yerləşən dövlət və qeyri-dövlət müəssisə və təşkilatlarına məktub ünvanlanıb. Bu barədə Turan-a Bakı Şəhər İcra hakimiyyətindən bildirilib.

Məktubda deyilib ki, paytaxtın Neftçilər, G.Səfərəliyeva, Ü.Hacıbəyov (Hökümət evinin ətrafı), İstiqlaliyyət, (Gənclər meydanı, Qoşa Qala Qapısı), Əziz Əliyev, Azərbaycan, Ə.Cavad, Bülbül, R.Behbudov, Azadlıq, 28 may, Xaqani, Xaqani adına bağın ətrafı (keçmiş “9 Yanvar" bağı), Nizami, Füzuli dairəsi, Ş.Qurbanov, Nizami metro stansiyasının qarşısındakı C.Cabbarlı və Z.Əhmədbəyov küçələrinin kəsişməsi Ə. Hüseynzadə küçəsinə qədər olan hissə, Ş.Bədəlbəyli, S.Vurğun, Füzuli, M.A.Əliyev və şəhərin digər mərkəzi hissələrini əhatə edən küçə və prospektlərində, müəyyən olunmamış yerlərdə, küçələrin səki hissələrində avtomobillərin saxlanması qadağan edilib.

Paytaxt meriyası avtomobil sahiblərinə avtomobilləri yeni istifadəyə verilmiş müasir tipli yeraltı avtomobil dayanacaqlarında saxlamağı tövsiyə edir. Əks halda avtomobillərin qanunsuz parklanmasına görə avtomobil sahibləri inzibati qaydada cəzalandırılacaq. -16D-