Arif Yunus yekun çıxışından sonra huşunu itirib (YENİLƏNİB-VİDEO)

Arif Yunusun halı yaxşılaşdıqdan sonra məhkəmə iclası davam edib. Leyla və Arif Yunuslar son sözlə çıxış ediblər. A.Yunus çıxışını bitirərkən huşunu itirib və az qala yerə yıxılsın. L.Yunus onu tutaraq “tez həkim çağırın” qışqırıb.

Bundan sonra məhkəmədə saat 16:00-dək fasilə elan edilib.

2015 Avqust 13 (Cümə axşamı) 12:59:30

Hüquq müdafiəçisi Leyla Yunus və onun həyat yoldaşı Arif Yunusun işi üzrə bugünkü məhkəmə prosesində vəkillərin yekun çıxışları olub. Onlar hər iki müttəhimə bəraət verilməsini xahiş ediblər. Bundan sonra müttəhimlər son sözlə çıxış etməliydilər. Lakin A.Yunusun vəziyyətinin qəflətən  pisləşməsilə əlaqədar iclas yarımçıq qalıb. MTN təcridxanasının həkimi çağırılıb. Prosesdə fasilə elan edilib.

Bu gün yenə müstəqil mətbuat nümayəndələri və vətəndaş cəmiyyəti fəalları məhkəmə zalına buraxılmayıb. Yalnız bəzi səfirliklərin təmsilçiləri və müttəhimlərin bir neçə qohumu içəri buraxılıb.

Qeyd edək ki, A.Yunusun səhhəti pisləşdiyindən məhkəmə iclasları iki dəfə yarımçıq qalıb və proses başqa günə keçirilib.

Bundan öncə prokuror L.Yunusun 11, A.Yunusun 9 il müddətinə həbs olunmasını istəyib. Onlar iqtisadi cinayətlərin törədilməsində günahkar bilinirlər. Lakin Leyla və Arif Yunuslar ittihamların siyasi sifarişli olduğunu bildirirlər.–06В--