Xədicə İsmayılovanın məhkəməsində şahid ifadələri başa çatıb

Avqustun 13-də Bakı Ağır Cinayətlər Məhkəməsində jurnalist Xədicə İsmayılın məhkəmə prosesi davam edib.

Bəzi diplomatik korpus nümayəndələri, jurnalistin  yaxınları məhkəmə zalına buraxılıb. 

Bugünkü prosesdə “Azadlıq” radiosunun keçmiş əməkdaşı Ülkər Akifqızı ifadə verib. Onun sözlərinə görə,  proses zamanı ona radio ilə bağlı ümumi suallar verilib.

Daha sonra Fərid  Abdullayevi  (radionun texniki nəzarət işləri üzrə işçisi olub) dindirmək istəyiblər. O, prosesə gəlmədiyindən ibtidai istintaqda verdiyi ifadəsi elan olunub.

Belə ki, o, ifadəsində bildirib ki, mülki müqavilə ilə işçi olub. Özü hər ay vergisini verib. Orada bir nüans vardı  ki,  cəmi bir dəfə “Azadlıq” radiosunun digər işçisi Cavanşir Ağamaliyevin hesabına maaşdan əlavə bir neçə min manat vəsaitin  gəldiyini,  həmin pulu bankdan çıxardığının şahidi olub. 

Bu zaman jurnalist Xədicə İsmayıl etiraz edib. O bildirib ki, Fərid Abdullayevin bu ifadəsi dəyişdirilib. 

X.İsmayılova    F. Abdullayevin  məhkəməyə çağırılmasını istəyib.

Lakin məhkəmə bu məsələyə  sonra qiymət verəcəyini bildirib.

Müdafiə tərəfinin Tural Mustafayevin intihar cəhdi ilə əlaqədar Şəhla Hümbətovanın əlavə şahid kimi dindirilməsi haqqında vəsatəti təmin olunmayıb. 

Sonra Fariz Namazlı vəsatət verib. Vəsatətin mahiyyəti ondan ibarətdir ki,   T. Mustafayevin  Xədicənin təkidi ilə Meydan TV-dən çıxarılması əlavə tədqiq olunsun.

Vəkillər Meydan TV-yə  sorğu göndəriblər. Həmin sorğuya cavab alıblar. Bu məsələnin  məhkəməyə təqdim edərək əlavə tədqiq olunmasını istəyiblər.

Məhkəmə qərara alıb ki, həmin sorğu əldə olunan mənbəyə şübhə doğurduğundan sübutlar siyahısına salına bilməz.

Bununla bağlı prokuror  Ramazan Hadıyev  buna etiraz edib.

Bu zaman X. İsmayılova bu məsələ ilə bağlı prokurorun  münasibətinin bəlli olduğunu bildirib.

“Ümumiyyətlə, bu işə baxan bütün prokurorluq heyətinin Maqnitski qanununa salınması üçün  dəfələrlə beynəlxalq qurumlara müraciət etmişəm. Həbsimdən öncə  ona görə onlar mənə qərəzlidirlər”, - o bildirib.

Buna görə məhkəmədən xahiş edib ki, tərəflərin bərabərlik prinsipinə hörmətlə  yanaşsınlar.

Daha sonra  vəkil F.Namazlı T.Mustafayevin "Azadlıq" radiosundan işdən çıxmaq istəməsi barədə Bakı bürosunun rəhbəri Babək Bəkiroğlu ilə e-mal yazışmalarının sübutlar siyahısına daxil edilməsi barədə vəsatət qaldırıb.

Müdafiə tərəfinin bu vəsatəti təmin edilməyib.

Sonra “Azadlıq” radiosunun nümayəndəsi Adil İsmayılovun məhkəməyə çağırılması ilə  bağlı vəsatət qaldırılıbb. Bu vəsatət də təmin edilməyib.

Xədicə İsmayılova deyib:  “Heç olmasa, radionu mənə görə yoxlayıb bağladığınızı açıq bildirməyin. Məni tutmaq üçün radionu bağlamısınız. Çünki radioda yoxlama aparıb məni tutmalıydınız, siz isə əksini etmişiniz”.

Vəkil F.Namazlı bildirib ki, T.Mustafayev zərərçəkən kimi ifadə verərkən Facebook-dakı şəxsi yazışmalarını prokurorluq orqanına könüllü vermədiyini deyib. Vəkil bildirib ki, buna görə də həmin yazışmalar sübutlar siyahısından çıxarılsın.

Dövlət ittihamçısı Ramazan Hadıyev T.Mustafayevin Facebook yazışmalarına baxışın həyata keçirilməsini yolverilməz hesab etmədiyini deyib.

Bu vəsatət də hakim tərəfindən təmin olunmayıb.

Eyni zamanda vəkil F.Namazlı Rabitə və Yüksək Texnologiyalar Nazirliyinin müvafiq strukturları və MTRŞ-nin nümayəndələrinin radionun yayımlanması məsələləri ilə bağlı əlavə şahid qismində məhkəmə prosesinə çağırılması barədə də vəsatət qaldırıb.

Dövlət ittihamçısı vəsatətin təmin edilməsinin əleyhinə olub. O bildirib ki, “Azadlıq” radiosu 2008-ci ildən lisenziyasız fəaliyyət göstərib, ona görə də qanunsuz sahibkarlıqla məşğul olub.

Məhkəmə müdafiə tərəfinin sonuncu vəsatətini rədd edib.

Vəkillər də, Xədicə İsmayılova da məhkəmənin çox sürətlə keçirilməsinə etiraz ediblər. Bildiriblər ki, “ekspress məhkəmə” keçirilir. 

Vəkillər məhkəmədən onlara vaxt verilməsini istəyiblər.

X.İsmayılova hakimə etiraz edib: “Məni 15 il cəza gözlədiyini deyirsiniz. Mən 15 il də, 25 il də həbsdə olmağa razıyam. Heç olmasa, bunun cüzi hissəsini burada, məhkəmə zalında səy göstərərək, hüquqlarım uğrunda mübarizə apararaq keçirərəm. Hüquqlarımı təmin edin. Mən başa düşürəm, mənimlə bağlı sizə sifariş veriblər. Nə qədər həbs cəzası verəcəyinizi də bilirsiniz. Bəlkə də hər gün burada gəlib məni görməkdən vicdan əzabı çəkirsiniz. Ancaq imkan verin, mən də hüquqlarımı qoruyum”. 

X.İsmayılova qohumları və vəkilləri ilə görüşməyi üçün heç olmasa, bir gün vaxt ayrılmasını istəyib. Ancaq buna imkan verilməyib. 

O, məhkəmənin gedişindən məyus olduğunu da deyib. 

Bununla da Xədicə İsmayılovanın  işi üzrə prosesdə siyahı üzrə  şahid ifadələri başa çatıb.

Vəkillər  prosesə əlavə şahidlərin  gətirilməsinin məhkəmə tərəfindən təmin olunmadığını deyiblər.

Məhkəmə prosesi avqustun 14-ə təyin edilib. 16B-