AXCP fəalının apellyasiya şikayətinə baxılır

Bakı/08.06.21/Turan: İyunun 8-də Bakı Apellyasiya Məhkəməsində hakim Faiq Qasımovun sədrliyilə xuliqanlıq ittihamı ilə 3 il 6 ay həbsə məhkum edilmiş Azərbaycan Xalq Cəbhəsi Partiyasının fəalı Səid Məmmədzadənin (Bakuvi)  apellyasiya şikayəti üzrə ilkin baxış olub.  Məhkəmə baxışı iyunun 22-nə təyin edilib.

Məhkəmə iclas zalına pandemiya səbəindən jurnalistlər buraxılmayıb. 

Vəkil Elçin Sadıqov “Amerikanın səsi”nə bildirirb ki, müdafiə tərəfi apellyasiya baxışının məhkəmə istintaqı ilə keçirilməsi barədə vəsatət verib. Lakin vəsatət qəbul edilməyib.

Azərbaycan Xalq Cəbhəsi Partiyası fəalının özü də cinayət işinin materiallarına əlavə olunmuş videogörüntünün məhkəmədə nümayiş etdirilməsini, araşdırılmasını istəyib. Onun sözlərinə görə, videodan da görünür ki, o, təqsirsizdir, zərərçəkmiş qismində tanınan Rüfət Məcidova nəinki xəsarət yetirməyib, ümumiyyətlə, onu vurmayıb.

Bu il aprelin 28-də Bakının Xətai Rayon Məhkəməsi hakim İbrahim İbrahimlinin sədrliyi ilə Səid Məmmədzadənin (Bakuvi) barəsində 3,5 il həbs hökmü çıxarıb və fəal məhkəmə zalında həbs edilib.

Ötən il mayın 18-də Bakının Xətai Rayon Məhkəməsi hakim Bəxtiyar Məmmədovun sədrliyi ilə fəalın barəsində 3 aylıq həbs qətimkan tədbiri seçib.

O, Cinayət Məcəlləsinin 221.3 maddəsi (xuliqanlıq - silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunduqda) ilə günahlandırılır.

Daxili İşlər Nazirliyinin mətbuat xidməti bildirib ki, Səid Məmmədzadə maşınyuma yerində vətəndaşa bıçaq xəsarətləri yetirməkdə ittiham olunur.

Ötən ilin iyulun 20-də Xətai Rayon Məhkəməsi Səid Məmmədzadənin barəsində seçilmiş həbs qətimkan tədbirinin ev dustaqlığı qətimkan tədbiri ilə əvəz olunması barədə qərar qəbul edib.

Səid Məmmədzadənin həbsi Facebook səhifəsində hökuməti və yüksək vəzifəli rəsmi şəxsləri kəskin tənqidindən sonraya təsadüf edir.

O, ittihamı qəbul etmir və məhkəmədə kiməsə xəsarət yetirmədiyini bildirib.

Azərbaycan Xalq Cəbhəsi Partiyasının sədri Əli Kərimli bildirib ki, ölkənin adlı-sanlı idmançısı, mötəbər yarışlarda Azərbaycan bayrağını dəfələrlə ucaltmış Səid Bakuvinin həbsi siyasi sifarişdir.-03D-