AXCP sədrinin qohumunun apellyasiya şikayəti təmin edilməyib

Sentyabrın 8-də Bakı Apellyasiya Məhkəməsində hakim İlqar Murquzovun sədrliyi ilə Azərbaycan Xalq Cəbhəsi Partiyasının (AXCP) sədri Əli Kərimlinin qaynı Elnur Seyidovun xəstəliklə bağlı vaxtından əvvəl azadlığa buraxılması barədə şikayəti təmin edilməyib. Bu barədə  AXCP Məlumat yayıb.

Vəkil Fəxrəddin Mehdiyev məhkəmədə Elnur Seyidovun xəstəliyi ilə bağlı yenidən ekspertizanın keçirilməsi barədə vəsatət verib. Lakin hakim vəsatəti təmin etməyib.

Əvvəlki ekspertizada onun dağınıq skleroz xəstəliyindən əziyyət çəkdiyi təsdiqlənsə də Qaradağ Rayon Məhkəməsi bunun Elnur Seyidovun cəza çəkməsinə maneə olmaması haqda qərar qəbul edib.

Bakı Apellyasiya Məhkəməsi həmin qərarı qüvvədə saxlayıb.

Elnur Seyidovu 2012-ci il martın 27-də Milli Təhlükəsizlik Nazirliyi həbs edib. O, keçmiş “Texnikabank”ın Yasamal şöbəsinin müdir müavini olub. E.Seyidov Cinayət Məcəlləsinin 178 (dələduzluq), 308 (vəzifə səlahiyyətlərindən sui-istifadə), dövlət təltiflərini, möhürləri, ştampları, blankları saxtalaşdırma, hazırlama, satma və saxta sənədlərdən istifadə etmə) və digər maddələrlə ittiham olunub. Bakı Ağır Cinayətlər Məhkəməsinin hökmü ilə E.Seyidov 7 il 6 ay müddətinə azadlıqdan məhrum edilib.

O, ittihamları qəbul etmir. AXCP məhkəmə hökmünü sifariş kimi qiymətləndirir və  E.Seyidovun həbsinin Əli Kərimliyə qarşı  qisas olduğunu bildirir. -03D-