Azadlığın qiyməti

“Azadlıq” qəzetinin baş redaktoru, siyasi mühacirətdə olan Qənimət Zahidin həbsdə olan qohumları Rüfət və Rövşən Zahidovlar KİV-ə və DİN-ə müraciət yayaraq jurnalistdən üz döndərdiklərini bildiriblər.

Əsasən Rövşən Zahidov onun anket məlumatlarında baş redaktor ilə qohumluq əlaqələrinin olması barədə informasiyanın ləğvini xahiş edir.

O, KİV-i onu vicdan məhbusları siyahısından çıxarmağa çağırıb.

“Mən və qohumlarım cənab prezident İlham Əliyevin daxili və xarici siyasətini bəyənirik və dəstəkləyirik,  bundan sonra da dəstəkləyəcəyik”, - Rövşən Zahidov  yazır.

Jurnalistin digər qohumu Rüfət Zahidov da təxminən bu cür çıxış edib.

Rüfət Zahidovun vəkili Bəhruz Bayramov Turan-ın müxbirilə söhbətində deyib ki, bu müraciətin yayılması onların tezliklə azad edilməsinə şərait yarada bilər.

“Mən hələ yayda, Zahidovların barəsində hökm çıxarılanda KİV-ə müsahibədə demişdim ki, bu günahsız insanların istənilən yolla azadlığa buraxılmasını məqbul sayıram”, - B.Bayramov vurğulayıb.

Hazırda Zahidovların işi apellyasiya instansiyasındadır.

Q.Zahid qohumlarının müraciətinə özünün Facebook profilində reaksiya verib: “Dövlətçiliyimizin düşməni olan “buxarinçi-kamenevçi-zinovyevçi- trotskiçi- kontrrevolyusionist, burjua-kapitalist” ünsürlərdən imtina etməyə hazır olan daha kimlər var?” 

Jurnalist həmçinin xaricdən yayımlanan “Azərbaycan saatı” teleproqramının aparıcısıdır. Proqramda Azərbaycan hakimiyyəti sərt tənqid eilir.

Rövşən və Rüfət Zahidovlar 2014-cü ilin iyulunda külli miqdarda narkotik maddənin qanunsuz dövriyyəsi  ittihamı ilə həbs olunublar. Bu il iyunun 28-də onların hər ikisi 6 il azadlıqdan məhrum edilib.

Amnesty International hüquq-müdafiə təşkilatı onları vicdan məhbusu kimi tanıyıb. Onlar yerli hüquq müdafiəçiləri tərəfindən siyasi məhbuslar kimi tanınıb və “siyasi girovlar” kateqoriyasına aid edilib. –06D--