Azərbaycan Demokratiya və Rifah Partiyasının fəalları Rusiya səfirliyinin qarşısında aksiya keçiriblər

Bakı/01.03.22/Turan: Bu gün Azərbaycan Demokratiya və Rifah Partiyasının bir qrup fəalı Rusiyanın Ukraynaya hərbi müdaxiləsinə etiraz olaraq Rusiyanın Azərbaycandakı səfirliyinin binası qarşısında etiraz aksiyası keçirib. 

Etirazçılar “Aqressiyaya yox!” yazılmış plakat qaldırıblar, həmçinin “Putin, rədd ol!”, “Müharibəyə etiraz edirik!”, “Rusiya ordusu Ukrayna ərazisindən çıx get!” şüarlarını səsləndiriblər.

Polis aksiya iştirakçılarını səfirliyin binasından uzaqlaşdırıb.

Bununla belə, partiya fəalı Əlövsət Sadıqlı bəyanat oxuyub. Sənəddə deyilir ki, Rusiyanın Ukraynaya  təcavüzü beynəlxalq hüquq normalarının pozulmasıdır.

“Ukraynaya qarşı müharibə ədalətsizdir, çoxsaylı insan tələfatına, o cümlədədn mülki insanların, uşaq və  qocaların kütləvi məhvinə səbəb olur və dayandırılmalıdır. Bu təcavüz regionda və dünyada sabitliyə təhdiddir və  dünya savaşına çevrilə bilər. Müharibənin dayandırılmasını və  Rusiya qoşunlarının Ukraynanın beynəlxalq səviyyədə tanınmış sərhədlərindən çıxmasını tələb edirik”, - bəyanatda deyilir.

Lakin Əlövsət Sadıqlı çıxışını bitirən polis aksiya iştirakçılarını saxlamağa başlayıb. Beş nəfər saxlanılıb. – 03B06-