Azərbaycanda «böyrək xəstəliyi» gəncləşir

Bu gün Azərbaycanda 100-dən çox xəstə böyrək köçürülməsi üçün növbə gözləyir. Turan-ın məlumatına görə, bu barədə Respublika Uroloji Xəstəxanasının böyrək nəqli şöbəsinin müdiri Şahlar Nəsirov bildirib.

Çərşənbə günü böyrək xəstəliklərinə həsr olunmuş tədbirdə çıxış edərkən o bildirib ki, böyrək xəstəlikləri “gəncləşir”.

Bu xəstəxanada ildə 1200-ə yaxın cərrahi əməliyyat həyata keçirilir. Ötən il 500 əməliyyat uşaqlar üzərində olub. Ümumilikdə il ərzində uşaq urologiyası şöbəsinə 2100-dən çox xəstə müraciət edib.

Öz növbəsində, hemodializ şöbəsinin müdiri Fariz Babayev bildirib ki, böyrək xəstəlikləri anadangəlmə və sonradan qazanılmış olur. Anadangəlmə xəstəliklər irsən keçir.

Ölkədə böyrək xəstəlikləri kəskinləşən xəstələrin sayı 10 minə yaxındır. Onların 3100-ü böyrək çatışmazlığı diaqnozu ilə hemodializ seanslarına cəlb olunub.

Onlar arasında 15 yaşına qədər 6 uşaq da var, ən kiçiyi 6 yaşındadır, deyə Babayev bildirib.

Uroloji Xəstəxananın  poliklinikasına ildə 4 mindən çox xəstə müraciət edir və onların təxminən 1000-nə stasionar müalicə təyin edilir.

Son üç ildə 49 xəstəyə canlı donordan böyrək köçürülüb.

Hazırda Azərbaycanda böyrək köçürülən xəstələrin sayın 732 nəfərdir, dövlət onların dərmanla təmin olunmasını öz üzərinə götürüb. -36C-